Pengawa Lim Guan Eng enda senipak enggau semaya

KUCHING: Mandal Presiden Parti Pesaka Bumiputera Bersatu (PBB), Datuk Abdul Karim Rahman Hamzah madahka Lim Guan Eng ti mega Menteri Wang siku orang ti bebelit jaku.

Karim ti mega Menteri Dagang Temuai, Seni, Main Asal, Nembiak, Lumba enggau Main madahka sebedau Pengawa bepilih Besai Ke- 14 ( PRU14), Guan Eng endang chukup andal ngagai Sabah enggau Sarawak.

Tang pengudah dichiri nyadi Menteri Wang di baruh perintah baru Pakatan Harapan ( PH) ulah iya enda senipak.

“Semua orang nemu iya nya Sabah enggau Sarawak ti nyadi pemeri besai ngagai ekonomi Malaysia lalu enti aku enda salah, urung setengah ari rizab menua datai ari Sabah enggau Sarawak. Nya kebuah Malaysia mesti nyaga hak Sabah enggau Sarawak.

“Enti deka seribu akal, enti enggai seribu tegal,” ku Abdul Karim lebuh dipinta ngenang pasal penerang Guan Eng ba Dewan Rakyat, Hari Tiga apin lama.

Dulu ari nya Abdul Karim ngabas palan projek ngaga Kampus Muzium Sarawak ditu ke diatu benung chakah dipejalaika sereta udah manggai 92 peratus pemansang fizikal.

Guang Eng ba aum parlimen di Dewan Rakyat, Hari Tiga apin lama madahka formula bekunsi penatai pemisi entara Putrajaya enggau Sabah sereta Sarawak semina ulih dipejalai nyentuk perintah besai ulih ngereja nya.

Abdul karim madahka Guang Eng enda ibuh bebelit laban nyema perintah besai deka ngereja nya sida ulih ngereja diatu.

Tambah mega ku Karim, perintah besai nemu berapa mayuh duit ti datai ari Sabah enggau Sarawak.

Karim mega minta Guan Eng ngambika enda nandu madahka perintah besai bisi penanggul belanja ketegal perintah ke sebedau tu.