Leon alit ati pegung nyemerai KSSA kelalu lama ditutup
KUCHING: Palan nyemerai di Komplek Lumba enggau Main Sri Aman (KSSA) ke ditutup kenyau ari taun ke udah ngalitka ati Chairman DAP Sri Aman Leon Jimat Donald.
Ba penemuai iya ngemata palan nya, Leon madah bisi jaku padah madahka palan ditutup ketegal kereja ngemanah benung digaga.
‘Enti diperatika ari semak, palan nya baka ke nadai napi sebarang penanggul. Tang ulih dipeda ai udah bebali chura gadung lalu baka ke bisi utai tumbuh.
“Aku deka betanya ngagai Perintah Negeri, nama kebuah pengawa ngemanah palan tu kelalu lama ti ngujungka ditutup kenyau ari taun ke udah?
‘Asai aku udah lebih setaun peranak Sri Aman enda nguna palan tu lalu tu mih seiti palan nyemerai ke bisi di Sri Aman,”ku Leon nengah surat penerang berita kemari.
Iya ke mega Mandal Chairman DAP Sarawak nambah, Perintah Nengeri patut badu madah bisi duit galau RM30 biliun enti duit nya enda dikena ngemanah palan nyemerai nya.
Ku iya, badu bejaku madah ngembuan palan main enggau lumba enti perengka guna nya enda ulih dikena.
“Aku minta menteri sereta sapit menteri lumba enggau main ngetu bejai Perintah Besai lalu bejalaika tanggungpengawa diri.
“Pekara tu mandang baka ka sida enda ulih mutarka penanggul ke bisi ditapi.
“Baka ni kitai deka nempa seiku agi champian olimpik nyemaka Pandalela Rinong ari Sri Aman enti palan nyemerai tu enda ulih dikena,”ku iya.