196 iku pesereta udah ngulu program Randau Digital di Miri
MIRI: 196 iku pesereta udah ngulu program Randau Digital ‘Ke Arah Masyarakat Digital’ ti diatur Sarawak Multimedia Authority (SMA), Angkatan Zaman Mansang (AZAM) Sarawak enggau kerejasama Opis Residen Miri ti udah dipejalai ditu, bedau lama.
Pengerami nutup program sehari nya udah dipenyadi Menteri Muda Dagang Temuai, Seni enggau Main Asal Datuk Lee Kim Shin.
Lee udah ngelalau pesereta kus nya ti ari raban Kaban Komiti Pemansang enggau Pengelikun Genturung Pendiau (JKKK), pedagang enggau pengari nembiak ngambika bekunsi sereta ngena penerang enggau penemu ti diulih ngagai komuniti di kandang menua sida empu.
“Anang nyimpan penerang ti diulih kita ungkup kita aja. Tang gaga mega randau ngagai peranak di kandang endur ba kandang menua kita ngambika penerang ti diulih kita nya ulih dikunsi enggau orang bukai,” ku iya.
Ku Kaban Kunsil Nengeri (ADUN) Senadin nya, program nya ulih mantu pesereta belajarka chara mutar penanggul sereta chara ngatur strategi inisiatif digital ungkup peranak di kandang endur sida.
“Kitai mega dekaka rayat nemu sereta sedar ke nama ti dipejalai Sarawak ari sukut penerang digital ke diatur SMA bekaul pengawa digital nyengkaum bejalaika Sarawak Pay ungkup pengawa mayar bil enggau penguji digital ke bukai.
“Pia mega, kerejasama ti enda putus endang diguna lebuh napi penguji lalu ngemunka program sereta aktiviti ke ulih mai komuniti ngagai ekonomi digital,” ku iya nambah.
Lee mega bisi enggau dalam bejuraika topik ‘Tanggungpengawa Ketuai Mai Komuniti Ba Renggat Baruh ngagai Ekonomi Digital’.
Entara topik bukai ke bisi dipejurai iya nya ‘Nentuka Komuniti Menua Pesisir ti ‘Digital Ready’’ ari Dekan Fakulti Sains Komputer dan Teknologi Maklumat Universiti Malaysia Sarawak (UNIMAS) Profesor Madya Dr Johari Abdullah enggau mega ‘Tikas Sedia Komuniti Dalam Ekonomi Digital: Kaul Komuniti enggau Librari’ ari Librarian Pustaka Negeri Sarawak Miri Lilian Baun Pulo.
Lalu bisi mega program bekunsi ke digaga nengah bekunsi e-pedagang indu Sarawak Neng Kho Razali sentang ‘Rekaan Bornei’ ti udah rembus ba Makit Antarabansa Nengah Platform Digital, sereta Pedagang Miri Rita ti bekunsi peneleba sentang produk ‘Homestay’ Menua Pesisir Ulih Rembus ba Makit Dagang Temuai Antarabansa’.
Woksyop dalam tim mega bisi dipejalai nengah topik ‘pemaksaan modal insan, e-Pelancongan, Usahawan Digital dan Pertanian dan Industri Asas Tani.
Program randau nya mega udah nerima kerejasama ari Opis Menteri Dagang Temuai, Seni, Main Asal, Nembiak, Lumba enggau Main Sarawak (MTACYS), Sarawak SME Online Niaga enggau Opis Betanam Betupi Sarawak.
Sama bisi datai Ketuai Seksyen Ngelangkar enggau Pemansang Rama Opis Residen Miri Ezra uda ti udah ngarika Residen Miri Sherrina Hussaini.