Beribu iku mensia ngulu Hari Tebuka TUDM 2018
KUCHING: Beribu iku orang ke diau ngelingi Mengeri Kuching datai ngemata Hari Tebuka Soldadu Langit Malaysia (TUDM) 2018 ke diatur di Pengkalan TUDM Kuching ditu, kemari.
Hari Tebuka nya diatur nyerumba pengawa ngintu Hari TUDM ke60 taun lalu dipenyadi Sapit Menteri Penyaga Menua Senator Liew Chin Tong.
Program ke jarang diatur di Kuching nya bela digulu Panglima Soldadu Langit Jeneral Tan Sri Affendi Buang.
Ba program nya, sekeda aset TUDM baka bilun jet Sukhoi SU-30, MKM, Boeing F/AD Hornet, Bae Hawk enggau Bilun Pengangkut Airbus A-400M bisi mandangka penyikar terebai.
Affendi ba aum pengarang berita pengudah bejadi program madah program diatur enggau tuju mandangka ngagai rayat sentang pengering enggau chara kereja TUDM.
“Program ngaul rayat tu seruran dkemerat kitai ngambi tau dikena nyadung penerang ngagai rayat sentang pengering enggau aset TUDM maya ke diatu.
“Kitai sigi udah nyadang program tu deka matak mayuh orang datai,” ku Affendi.
Nyaut tanya bukai ari pemberita, Affendi madah TUDM diatu keran nentuka semua aset ke dikembuan mengkang manah.
Baka ke kala disebut aku dulu agi ari tu, pemar diatu iya nya kitai nedai chukup agih belanja.
“Kitai bisi perambu dikena nentuka aset tu mengkang manah lalu tu nyadi seiti pemar ketegal penangul ba pekara belanja.
“Enti agih belanja ke diterima bisi lebih mimit, kitai ulih ngangkatmanah aset ke diatu,” ku iya.