Regata Sarawak dikearap nyadi program pematak temuai ti nyelai
KUCHING: R e g a t a Sarawak- Festival Waterfront Kuching ke diatur ninting taun dikearap ulih ngangkatka nama Sarawak di mata dunya lalu nyadi program pematak temuai ke mansang, progresif, likun enggau nyelai.
Kepala Menteri, Datuk Patinggi Abang Johari Tun Openg madah rambau regatta, mayuh aktiviti bukai bisi mega diatur berengkah 26 Oktober nyentuk ngagai 4 November 2018.
Antara aktiviti iya nya, Lumba Bot Naga Antarabangsa, Dapur Sarawak, promosyen Kraf Malaysia, pengawa mandangka main asal, seni enggau pesaka.
“Regata Sarawak nyadi ikon ungkup Negeri Sarawak dikena matak mayuh agi temuai datai ngelawa nengeri tu.
“Pemujur Regatta Sarawak taun tu mandangka kaul manah tetiap ejensi baika nya ba Perintah Nengeri tauka Besai sereta mega ijinsi korporat,” ku iya rambau bejadi Regatta Sarawak di Waterfront Kuching ditu, kemari.
Ba pengerami nya, Iya bisi mega ngemujur pengawa Nitik Mata Naga ke nyadi simbolik bejadi Pekit Lumba Bot Naga Antarabangsa.
Abang Johari bisi mega bejadi Promosyen Kraf Malaysia ke dipasuk 100 iku orang dagang Sarawak nyengkaum sida ari Sabah enggau Semenanjung Malaysia.
Bela dipenyadi iya nya Dapur Sarawak ti nyual bemacham pemakai enggau ai irup sepemanjai Regatta Sarawak di Waterfront Kuching.
Ngenang kaul ke sama, Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah lebuh dirandau madah pekit belumba Bot Naga Antarabangsa taun tu dipasuk 12 iti menua.