Nitihka pansik ari JBPM antara 30,000 enggau 60,000 kes penusah angus bisi diripot ba menua tu ninting taun
SIBU: Mayuh agi program penyedar pengelikun penusah angus enggau latih napi penusah angus patut diatur ba genturung pendiau berindik ari mayuh penusah angus ba rumah ti udah nyadi.
Mansutka langgur penemu tu, Penyanding Penemu Pekara Pengelikun, Tan Sri Lee Lam Thye nyemetak madahka ninting taun antara 30,000 enggau 60,000 penusah angus bisi diripot ba menua tu.
“Pukul rata, urung 6,000 buah rumah kedai angus ninting taun enggau urung 40 peratus ari kes tu rumah peribit.
“Nitih ku statistik Opis Pengerara Api enggau Penyah Penusah (JBPM), antara 120 enggau 150 iku udah bebadi nyawa ba penusah angus ninting taun. Tu mega ngayanka anak mit parai tetiap dua minggu ari penusah angus sereta betu enggau tebal agi sida ti bebadi nyawa tepekul ba rumah,” ku iya ba sebengkah penerang berita.
Seraya ba Amerika Syarikat, 31 peratus ari semua penusah angus diripot ninting taun nyadi ba genturung pendiau lalu penusah tu ketegal beberapa pugu pengawa nyengkaum pengilap, nunu babas enggau berapi, ku Lee.
Nya alai, kunchi dikena nagang penusah angus iya nya meretika pun penusah nyadi, baka ari ni api suah nyadi enggau nama ngasuh nyerarai.
Ba pekara tu, iya meri langgur penemu ngagai gempung ukai dikuasa perintah (NGO) enggau gerempung peranak gawa begilai enggau ejensi bekaul baka JBPM enggau Opis Pengerai ngatur program baka nya.
Lee madahka Opis Menteri Kaunsil Kandang Menua enggau Pengawa Berumah (KRT) mega patut berundingka perambu dikena ngelangkar “Fire Safety Week” menua, ke alai perintah enggau sektor peribit tau besaup ngajar mensia mayuh pasal pengawa nagang enggau pengelikun ari penusah angus.
Antara aktiviti dilanggur ungkup Fire Safety Week iya nya audit pekara pengelikun, ngajar bala nembiak pasal api tau nganu enggau ngatur latih penusah angus, ku iya nambah.
Ku iya, taja JBPM udah ng- atur beratus kali licha sedarka pengelikun penusah angus enggau latih penusah angus ninting taun, patut mayuh agi pengawa dipejalai nentuka mensia mayuh disikap ngena penemu enggau pengelandik nyaga pengelikun ari penusah angus.
“Kitai patut naka ulih ngelawa berapa mayuh orang ti diau ba rumah enggau opis lalu sida patut nemu baka nyadi orang keterubah ti minta sah dikena mantu nagang api ari nyerarai ba renggat tumu.
“Bala nembiak sekula patut diajar pasal risiko enggau pengelikun ba penusah angus laban sida ulih mantu ngenataika penemu ngagai diri sebilik enggau bala bakih,” ku Lee.
Ku iya, semua orang patut belajarka chara nyelamatka diri ba penusah angus lalu nempa pelin pengelikun rumah enggau jalai pansut maya penusah ngenyit, ti tau ngembing sida ba rumah pansut ari endur nya enggau likun maya penusah angus nyadi.
Iya ngasaika apai indai mesti meri penemu enggau bekunsika pelin ngemansutka diri ngagai bala anak sida laban pansik udah ngayanka ari pemisi penemu, pengelandik enggau penyikar, mensia mayuh ulih ngemimitka risiko enggau nagang api dataika raban profesional ngesah sida.
Raban bekuasa, ku iya nambah, mesti meri peransang ngelekatka kereban ulih nemu penusah angus, baka nemu sebum tauka kereban penggera penusah angus laban pengelikun sida ke diau dia mega bepanggai ba nya.
Taja mayuh begunan dagang besai bisi kereban baka tu, ukai semua rumah sida bisi dilekat tauka bisi ‘fire blankets’ tauka kereban pengerara api ba dapur, suah agi pun api nyadi, ku iya.
“Tetiap rumah patut abis nadai ngembuan perengka ngerara api ulih mindah kin kitu seraya sida ke diau dia mesti nemu baka ni ngena iya enggau chara ti betul. Bala sida mega mesti dilatih pansut ari begunan nengah jalai ngelarika diri ti enda tepekul tauka alit,” ku iya.
“Semua sida ke diau dia mega mesti bisi akses muntang ngagai kunchi enti sema pagar enggau pintu bekunchi.
“Aku pechaya, pengawa nagang penusah angus patut nyadika pekara dikemerat semua orang, nyadi pekara kepenudi ti deka dikereja kitai iya nya baka ni ngerara api,” ku Lee nandu.
Pukul rata, urung 6,000 buah rumah kedai angus ninting taun enggau urung 40 peratus ari kes tu rumah peribit. Tan Sri Lee Lam Thye Penyanding Penemu Pekara Pengelikun