SK Tulai deka bisi ‘Dewan Serbaguna Berbumbung’ ba taun 2020
BINTANGOR: Sekolah Primari ( SK) Tulai, Bintangor deka digagaka ‘Dewan Serbaguna Berbumbung’ ti berengkah dipenyadi ba taun 2020.
Berita gaga tu dibantaika Kaban Kunsil Nengeri (ADUN) Meradong Datuk Ding Kuong Hiing maya dipebasa bejadika Pengerami Lumba enggau Main SK Tulai 2018 sereta Sukaneka Gerempung Apai Indai enggau Pengajar ( PIBG) SK Tulai, empai lama.
“Projek tu deka digaga nengah Program Transformasyen Menua Pesisir (RTP).
“Semua sekula di Meradong deka ditulung magang enda ngira sekula nya besai tauka mit,” pia ku iya madah.
Sama bela datai maya tu iya nya pengari Opis Pelajar Pelilih Meradong Alexander Vincent, Kepala Pengajar SK Tulai Nicholas Renang sereta bala tuai rumah ari lima buah rumah panjai.
Berebak enggau tu mega Ding madahka projek RTP ngaga jalai enggau palan paking kereta Rumah Suring Sana ke benung digaga maya tu bela dikeandal deka mai pengelantang ngagai bala pengajar SK Tulai.
Nyentuk ke diatu, peranak Rumah Suring betapi enggau penanggul nadai palan paking kerita lalu semampai ngenyadika palan paking kerita rumah panjai bukai ke besemak.
Rumah panjai tu mega bela agi bekenaka jematan enggau jalai kayu ti semina ulih ditengah ngena mutosikal aja.
“Ngarapka penembu projek tu ila bela mai pengelantang ngagai bala pengajar lebih agi baka palan endur paking kerita tauka jalai ti meruan agi ngelawa sekula,” ku iya madah baru.
Bekaul enggau pengerami sehari nya, Ding ngarapka bala nembiak deka dibantai enggau penemu sereta nempa peneleba bebendar agi enti deka ngulihka pemujur.
“Kitai meseti nemu nengah lumba enggau main kitai ulih nempa nembiak ti ngembuan penemu betikas tinggi iya ke nyadi serak tubuh nganti kitai megai menua tu ila.
“Pia mega pengerami baka tu nyadi platform ke engkeman numbuhka penyerakup antara pangan bala apai indai enggau pengajar,” pia ku iya madah.
Awak nya dikena iya ngelalau bala apai indai ba sekula nya nanggam kerejasama ti manah begulai enggau pengajar ba tuju besaup ngelawa pemujur sekula.
Maya pengerami nya, Ding bela bisi nyuaka pemeri RM3,000 ngagai sekula nya.