175 pintu peranak ari Sebayang enggau Tusok udah disikap BELB
TANJUNG MANIS: Sepenyampau 175 pintu bilik peranak rumah panjai ari sitak Sebayang enggau Tusok diatu udah disikap ngena perengka guna Bekal Kuasa Karan Menua Pesisir (BELB).
Rumah panjai tu mungkur Rumah Panting Untok, Mengkang Rangkong, Saung Abang, Entiu Yuoh, Balang Barang, Baki Bujok, Ukat Chileng, Johny Kubau, Bangga Mujah, Francis Bujang Jelan enggau Unjil Rawu.
Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madah sepenyampau 907 iku peranak ari 11 buah rumah panjai nya udah berengkah ngasaika perengka guna dalam taun tu tadi chara berenggat.
“Kitai sedarka perengka guna baka tu udah lama dianti bala komuniti kelebih agi kandang menua pesisir.
“Pengawa tu mega nyata ngayanka kitai seruran bebendar gawa nyapai tetiap juluk enggau pengarap bala komuniti ti udah dikenatai ngagai kitai ti nyadi pengari rayat sida.
“Pejalai projek tu nyadi sebagi ari pengawa perintah nengeri ngemansangka penyikap perengka guna pemun ungkup rayat,” ku iya.
Len mansutka jaku nya lebuh Pengawa Bejadika BELB ba Rumah Panting Untok Sebayang, kemari.
Kenu ku Len, projek tu udah dipejalaika Opis Menteri Bekal Ai enggau Elekterik Menua Pesisir Sarawak nengah projek Meri Bekal Kuasa Karan Menua Pesisir.
Kelimpah ari nya ku iya, beberapa projek pemansang bukai mega benung chakah dipejalai ba sitak nya ti mungkur pengawa ngaga enggau nyeleti jalai alun enggau mega bekal ai beresi.
“Kelimpah ari perengka guna kuasa karan, aku mega kala besemaya deka nyendia jalai alun. Semaya tu udah dikeamat diatu. Taja pia, aku deka seruran deka ngemai mayuh agi pemansang ungkup rayat ditu.
“Pengawa ti dikemeratka aku mega meruan nuju sitak bukai ti apin ngasaika perengka guna tu. Nya kebuah aku ngarapka kerejasama semua nyengkaum bala ketuai komuniti enggau peranak menua tu ngambika semua perambu ulih dipejalai enggau lanchar,” ku iya nambah.
Ba lansa bukai, Tuai Rumah Panting Untok madahka perengka guna BELB iya nya siti pekara ti udah lama dianti peranak sitak nya.
“Nengah pengawa tu, semua peranak ditu deka ngenataika jaku terima kasih. Perengka guna ti disedia tu ukai semina ngemuntangka pengidup besehari sehari, tang mega chukup besai reti ngagai kami,” ku iya.