Pengerami Makai Taun Ke-36 Gerija Mary Immaculate Conception richah

KAPIT: Gerija Mary Immaculate Conception (GMIC) ditu taun tu mujur ngintu Pengerami Makai Taun Ke136. Iya udah ditumbuh dalam taun 1882 lalu nyadi siti ari gerija Katolik pemadu tuai ba Borneo.

Ba taun terubah iya, 1882 nyentuk ujung taun 1950an, gerija semak Nanga Sungai Kapit, lalu raban gerija tu kelimpah ari ngerembaika pengarap Kristian ngagai peranak, sida mega nyendiaka pelajar sekula ungkup bala nembiak mit enggau ngemai peranak ngelala pengawa betanam betupi.

Bejaku ba mua urung 700 iku bala ti datai berami, Paderi Mathew Olilli nyemetak madahka pengerami taun tu nibak jaku ‘How Good and Pleasant It Is When God’s People Live Together In Unity – PSALM 133:1’.

“Tibak jaku tu ngingatka rayat ngambika idup begulai,” ku iya ti sebedau tu ngetuaika Gerija Mary Immaculate Conception Kapit, tang diatu mindah gawa ngagai Gerija Saint Francis Xavier Kanowit.

Iya minta sida angkunka pengawa diri naburka pengasih enggau penyerakup, siti runding enggau siti ati begempung di baruh gerija.

Iya mega ngelaluka penatai raban Katolik ari luar baka ari Long Singgut, Belaga, Song, Kanowit, Sibu, Julau, Bintangor, Sarikei, Mukah, Dalat ngulu pengerami nya lalu penatai sida nya kelai sukung ngagai raban Katolik Kapit.

Ba lansa bukai, Ambrose Abong Bugek ti ngarika Kaban Parlimen (MP) Kapit Datuk Alexander Nanta Linggi madahka Nanta ngembuan ati siruka rayat lalu beratika semua institusyen pengarap.

“Ambika chunto, Gerija Iban Methodist Bukit Goram enggau Gerija Anglikan Bukit Goram ari terubah gerija nya digaga dataika iya tembu. Diatu Gerija Methodist Iban Kapit,” ku iya.

Ambrose ngarika Nanta udah ngemendarka geran belanja penyampau RM50,000 ngagai Gerija Mary Immaculate Conception baka ti dipinta bala komiti gerija sebedau tu, dikena sida bejalaika pengawa nyeleti enggau ngemanahka gerija.

Antara aktiviti bisi diatur nyerumba pengerami baka koir, pemerindang live band, tanda, chabut tikit benasit, insentif ungkup nembiak ti nyulut ba peresa perintah sereta suara emas.

BEJADI: (Ari tujuh kiba) Ambrose Abong enggau Paderi Mathew Olilli begulai mangkung tawak bejadika Pengerami Makai Taun Ke-136 gerija nya ditumbuh.

DIKELALU: Penatai (ari kiba) Paderi David Ho, Ambrose, Paderi Mathew Olilli, Watson Awan, Paderi George Omutto enggau Favian Masing disambut ngena basa.

KELAI BASA: Marian Guild ngelalu penatai temuai ngena koir.

PERANSANG PELAJAR: Siku ari 22 iku nembiak ti nyulut ba peresa perintah nerima insentif iya.

MERINDANG: Raban nembika Katolik merindang bala mayuh ngena lagu.