Abg Johari dikeandal ulih nagih kuasa, hak Sarawak

KUCHING: Chairman Pakatan Harapan( PH) Sarawak Chong Chieng Jen ngarap Kepala Menteri Datuk Patinggi Abang Johari Tun Openg bebendar nagih kuasa enggau hak nengeri bepelasarka Sempekat Malaysia 1963 (MA63).

Ku iya, Abang Johari diatu ba penuduk ke pemadu manah ba sentang pekara nya alai iya udah dipilih dalam Komiti Kabinet ‘Khas’ MA63.

“Aku ngarap iya(Abang Johari) ulih ngeringka diri ba dalam kabinet nya lalu ukai semina berani di Sarawak nengah chara mansutka penerang ngagai pemberita,’ku Chong ba aum pengarang berita ditu, kemari.

Iya ke mega Chairman DAP Sarawak nambah Abang Johari ke ba dalam komiti 16 iku ketuai nya meseti ngenataika pinta ti tau mai pemaik ngagai peranak Sarawak.

Chong pechaya Abang Johari deka nerima sukung ari rayat Sarawak ba sentang pekara nya lalu ngarap iya enda mayuh dalih agi.

Abang Johari bedau lama tu tadi bisi madah enda lantang enggau raban Komiti Kabinet ‘Khas’ MA63 alai iya dekaka raban ketuai ke dipilih meseti bepelasarka Komiti Entara Perintah(IGC).

Iya mega minta Sarawak enggau Sabah bisi pengari ke chukup ba komiti nya.

“Tu komiti ti deka bejuraika MA63. Penyampau pengari nya pekara lumur dua. Ke pemadu berat, raban komiti ulih mantaika pinta enggau peneka.

“Abang Johari meseti berani ngenataika pinta ngagai Menteri Besai(Tun Mahathir),’ku Chong.

Kelimpah Abang Johari komiti mega diarika Menteri Kereja Raya Baru Bian, Ketuai Luya Sarawak Datuk Talat Mahmood enggau Ketuai Akim(Sabah enggau Sarawak)Datuk Seri David Wong Dak Wah.

Sabah diarika Kepala Menteri Datuk Seri Shafie Apdal, Menteri Dagang Antarabangsa enggau Industri Darell Leiking, Menteri ba Opis Menteri Besai Datuk Liew Vui Keong enggau Ketuai Luya Sabah Datuk Zaleha Rose Pandin.