Kelimpah ngemansangka modal mensia sida mega diperansang ngaul diri ba pengawa industri dikena nyaup komuniti
KOTA SAMARAHAN: Tuai Pemegai Menua (TYT) ke mega Chanselor UNIMAS Tun Pehin Sri Abdul Taib Mahmud minta universiti nya bejalaika tanggungpengawa ke lebih besai agi kelimpah ngemansang modal mensia.
Ke pemadu berat ku iya, ngemansang orang ti deka ngaul diri ba pengawa industri sereta ulih nyaup ngemansang komuniti.
“Pekara tu patut disukung Perintah Sarawak,” ku iya rambau bejadi Konvokesyen Universiti Malaysia Sarawak(UNIMAS) di DeTAR Putra UNIMAS ditu, kemari
Taib berasai temegah ketegal UNIMAS ngembuan kaul ke rat enggau Perintah Nengeri enggau Perintah Besai sereta piak industri ba atur ngemansang Sarawak.
Iya pechaya, pengelandik raban akedemik UNIMAS ba mayuh bengkah pengawa ulih nyaup ngemansangka nengeri.
Berindik enggau nya, iya ngelalau UNIMAS ransing agi lalu ngembuan tenung ke jauh ba atur nempa kurikulum baru.
“Kurikulum baru tu deka mantupka pinta industri sereta seraris enggau pengeran kitai ngemansang komuniti,’ku iya.
Taib muji pengawa Perintah Nengeri ti keran deka mai nengeri tu mansang nengah ekonomi digital alai Sarawak Multimedia Authority(SMA) udah ditumbuh ngambi tau matau strateji enggau insiatif digital.
Ku iya, Strateji Eknomi Digital Sarawak 2018-2022 ngembuan 29 bengkah pekara ungkup sektor ekonomi iya nya ba pengawa betanam betupi, industri pemansut 4.0, dagang temuai, mengeri pintar, pengerai digital, e-da- gang, perintah digital enggau rama.
“Strateji tu mega mungkur 18 bengkah pengawa ke mungkur perengka guna digital, pengelandik digital enggau pemansang pengelandik, pansik enggau pemansang ekonomi digital.
“Inovasyen digital enggau pengawa dagang, digital enggau data, pengelikun siber enggau peneras digital.
“Aku pechaya semua strateji tu deka ngangkatka Sarawak ba ekonomi digital lalu nguluka dunya digital,’ku Taib.
Pekara tu patut disukung Perintah Sarawak. Tun Pehin Sri Abdul Taib Mahmud Chanselor UNIMAS