Sukung sereta peransang indai mai reti ke chukup besai ngagai Cindy
KOTA SAMARAHAN: Graduet nyelai pendiau ti ngemegahka Universiti Malaysia Sarawak ( Unimas), Cindy Yeo Siaw Hui meri pemujur nya ngagai indai iya, Lee Jin Mui, ungkup pengawa dikereja sekumbang empat taun nyempulang iya belajar ba kelas.
Cindy iya nya graduet Sarjana (Kewangan) ti nerima ijazah ari Tuai Pemesai Menua (TYT), Tun Pehin Sri Abdul Taib Mahmud ba sidang keterubah Konvokesyen Unimas Ke-22, kemari.
Kenu ku indu beumur 29 taun nya, timpang batang tubuh kenyau ari ada, sukung diberi indai iya mai reti besai amat ba pengidup iya nyadi Raban Nyelai Pendiau (OKU).
“Aku deka nguji ngatika diri enggau deriba kediri empu ngagai kelas tang laban irauka pengelikun aku, indai sanggup ngaling aku ngagai kelas ninting hari, bisi maya iya deka nganti dataika kelas aku tembu.
“Pengawa indai tu bisi asil laban juluk iya deka meda aku nyadi siku graduet tejapai,” ku iya, penatai asal ari Kuching lebuh dirandau, bela disempulang indai enggau apai iya, Yeo Kit Leong.
Berebak enggau nya, Cindy mega ngarapka pemujur menggi gelar graduet nyadi peransang ngagai raban OKU bukai, ngangkatka pelajar nyadi pekara dikemerat dikena ngubah nasit enggau pengidup sida dudi hari.
“Jarang kitai ninga OKU nerima pelajar tinggi. Nadai pelajar, OKU enda ulih mindah kini-kini, semina pelajar ulih ngubah nasit sida,” ku iya.
Taja pia, pemar ditapi Cindy diatu iya nya ngulihka kereja laban pengawa puang ti bisi diatu enda nerima OKU.
“Aku agi tusah ati. Mayuh pengawa pulang nadai nerima OKU lalu pengaji mega enggai ngambi OKU bekereja. Tebal agi begunan mega nadai perengka guna ungkup raban OKU,” ku iya.
Nyeritaka pemujur iya nembuka pelajar ba Unimas, pengkuan ari tiga diri menyadi madahka kunchi pemujur iya nya enda mudah putus pengarap.
Iya ti diatu bekereja nyadi eksekutif ba sebuah serikat peribit mega merambu deka nampung pelajar tikas Ijazah Doktor Falsafah (PhD) di Unimas.
Seraya, Fahizan Mahmud, 23, diangkat nyadi penerima Anugerah Pelajaran Di Raja (Pingat Jaya Cemerlang) mega ngangkatka indai iya nyadi peransang ngagai pemujur nya.
“Pekara ti dikereja aku tu ngasuh indai lantang sereta deka nyamin pengidup dudi hari menyana agi. Tu mih resia aku kelimpah ngemeranka disiplin enggau fokus tinggi lebuh dalam kelas,” ku iya, graduet Sarjana (Kejuruteraan Mekanikal dan Pembuatan) lebuhka dirandau.
Nitih ku anak pengkuan ari enam iku diri menyadi, apai iya udah midang lebuh iya belajar ba pom satu, lalu berengkah ari nya, indai iya ngemesaika sida.
Madah silik, ku iya, sida sebilik lebuh nya diau ba Sarikei mindah ngagai Kuching dalam taun nyin tadi, ngujungka iya ulih nampung pelajar ba Unimas enggau lantang.
“Lebuh ba universiti, tagit aku semina deka ngereja memanah ba pengawa dikereja, anugerah tu endang nadai dijangka,” ku iya.
Fahizan ti diatu mega benung bekereja enggau sebuah serikat peribit merambu deka nampung pelajar nyapai juluk ati iya nyadi pengelicha.