Bisi 4,103 graduet nerima ijazah ba Konvokesyen UNIMAS Ke-22

KOTA SAMARAHAN: Penyampau 4,103 graduet nerima ijazah sida ba mayuh renggat pelajar iya nya ari Ijazah Doktor Falsafah, Ijazah Sarjana enggau Ijazah Sarjana Muda ba Konvokesyen Universiti Malaysia Sarawak (UNIMAS) Ke-22.

Program konvokesyen ke 22 nya dipenyadi Canselor UNIMAS, Tuai Pemegai Menua( TYT) Tun Pehin Sri Abdul Taib Mahmud ba sidang keterubah, pagi tadi.

Ba sidang keterubah, Pro Canselor UNIMAS, Kepala Menteri Datuk Patinggi Abang Johari Tun Openg diberi gelar ‘Ijazah Kehormat Doktor Faksafah Ekonomi Pembangunan’.

Bela disua iya nya gelar akedemik baka ka Anugerah Pelajaran Di Raja(Pingat Jaya Cemerlang), Anugerah Canselor enggau Anugerah Pro Canselor ngagai graduet ke dipilih nengah penyulut ba akademik enggau ko kurikukum sepemanjai belajar di universiti.

Taib mega nyuaka ijazah doktor falsafah(PhD) enggau sarjana ngagai 407 graduet alai 67 iku penerima PhD lalu laluh ke bukai penerima sarjana.

Ari penyampau nya, 250 graduet PhD enggau Sarjana asal ari Sarawak sereta 340 iku ari Semenanjung Malaysia.

Serak tu, graduet antarabangsa bisi 83 iku iya nya 17 graduet PhD, 20 graduet Sarjana enggau 24 (Sarjana Muda).

Sida tu ari menua Afganistan, Bangladesh, Brunei Darussalam, China, Indonesia, Korea Selatan, Kyrgzstan, Pakistan, Saudi Arabia, Tajikistan, Turkey, Ghana, India, Iraq, Libya, Nigeria, Amerika Syarikat enggau Vietnam.

Bela dikemegah UNIMAS, seiku graduet Sarjana(Pekara Wang) iya nya seiku graduet ‘istimewa’tauka orang nyelai pendiau(OKU), Cindy Yeo Siaw Hui.

Konvokesyen ke 22 nya bela digulu bini Taib, Toh Puan Ragad Kurdi Taib, Pro Canselor Datuk Patinggi Tan Sri Alfred Jabu enggau Mandal Canselor UNIMAS Prof Datuk Dr Mohamad Kadim Suaidi.