Sekumbang udah nyadi KM, Abg Johari mayuh agi ngemansang menua pesisir

KOTA SAMARAHAN: Sekumbang udah mangku pengawa berengkah ba bulan Januari 2017, Kepala Menteri Datuk Patinggi Abang Johari Tun Openg udah ngeluarka belanja RM7.01 bilion ungkup pengawa pemansang.

Tebal agi agih belanja nya ku iya dikena ngemansang kandang menua pesisir enggau tebing tasik.

“Kandang endur Hulu Rajang aja nerima agih belanja RM1.472 bilion ungkup timpuh 2 taun ti deka datai.

“Agih belanja ngelui satu bilion nya udah tentu deka ngubah landskap pemansang di Song, Kanowit, Kapit, Belaga enggau kandang endur ngelingi,”ku iya.

Abang Johari mansutka jaku nya ba Konvokesyen Universiti Malaysia Sarawak(UNIMAS) Ke-22 ke diatur di DeTAR Putra UNIMAS ditu, kemari.

Ba pengerami nya, iya bisi nerima gelar ‘ Ijazah Kehormat Doktor Falsafah Ekonomi Pembangunan’ ke disua Chanselor UNIMAS, Tuai Pemegai Menua (TYT) Tun Pehin Sri Abdul Taib Mahmud.

Abang Johari ke mega Pro Chanselor UNIMAS nambah, polisi pemansang ke dikena Perintah Nengeri chukup inklusif ngambika nadai bansa sereta kandang endur di nengeri tu tinggal ari pemansang.

Ku iya, empas ari program pemansang enggau pengerembai ekonomi patut ulih diasai semua peranak nengeri tu.

Iya mega madah Perintah Sarawak deka terus meratka nasit peranak nengeri tu lalu enda ngarapka bantu ari Perintah Besai.

“Nya mih kebuah Perintah Nengeri ke diarika Gabungan Parti Sarawak (GPS) keran nengah komitmen ke tegap deka nyendia perengka guna ngagai rayat.

“Tu ukai pekara politik, tu sentang pemaik jemah ila alai pemaik tu enda ulih dilempaika ba politik mudah.

“Ditu aku deka meri jamin diak kitai keran deka ngerapitka bida entara kandang menua pesisir enggau kandang mengeri, entara genap pupu bansa di nengeri tu,’ku iya.

Aku ngarap bida ekonomi tu ulih dirapit nengah polisi ke pragmatik enggau holistik, sereta nengah tenung ke jauh, tandu Abang Johari.

Ngenang kaul ke sama, iya madah Bank Pembangunan Sarawak (DBOS) deka nyaup ngemujur projek stratejik ti ulih ngaga ubah ba pekara ekonomi enggau digital Sarawak.

Atur ngulihka hak bempu Palan Hidroelektrik Bakun ari Perintah Besai ku Abang Johari deka ngenegap pengawa ngeluarka kuasa ke tau dikena matak pemeranak puku ari menua luar.

‘ Pemansang ekonomi digital dikemerat ba atrur pemansang Nengeri Sarawak.

“Aku keran deka ngemansang digital ekonomi alai RM1.0 biliun udah disedia dikena ngaga mayuh agi perengka guna telekomunikasyen.

“Kitai ngaga tiang pemanchar ari 1,200 ke diatu nyentuk ngagai 5,000 iti,’ku iya.