Ding deka ngenan penuduk DUN Meradong ba PRN12
BINTANGOR: Kaban Kunsil Nengeri (ADUN) Meradong Datuk Ding Kuong Hiing udah meri kelai iya deka bediri baru ba penuduk nya maya Pengawa Bepilih Nengeri Ke-12 (PRN12) ti deka datai.
Juluk ati iya tu tebantai maya bejaku ba siti pengerami ke diatur pelilih Meradong ditu, empai lama tu tadi.
Maya nya, iya minta pengundi ti ngundi ba palan ngundi di SK Tulai, Bintangor mengkang nyukung iya serak pengawa bepilih nengeri tu ila.
Palan ngundi tu ditapatka peranak lima buah rumah panjai bejalaika tanggungpengawa ngundi.
“Ngarapka kita (pengundi) nyukung aku baru maya pengawa bepilih nengeri ti disadang deka diatur ba taun 2021,” pia ku iya madah maya nya.
Ba PRN11 taun 2016 suba, Ding chalun Barisan Nasional (BN) bulih majoriti 1,516 tauka 6,865 iti undi ngalahka chalun Parti Tindakan Demokratik (DAP) Ting Tze Fui (5,349).
Pemujur Ding ba DUN Meradong, kelimpah chalun BN (diatu Gabungan Parti Sarawak/ GPS) ke bukai diberitaka bepun ari pengelandik Kepala Menteri maya nya, niang Pehin Sri Adenan Satem ti nyadi ketuai parti BN.
Pemutus niang Adenan ti milih Ding bediri ba penuduk nya suba balat ngasuh bala pengundi tekenyit nyentuk bisi enda lantang ati laban orang ke diandal sida nyadi chalun enda dipilih bediri.
Tang taja pia, penemu niang Adenan enda ngelebu rayat DUN Meradong bepun ti nyentuk ke diatu berengkah ke udah dipilih nyadi pengari rayat, Ding tampak dipeda suah mantu rayat.
Tu tau dipeda ari program iya begulai enggau rayat semampai bisi diatur belama kelimpah mayuh projek udah mujur sereta benung digaga.
Maya pengerami ti diatur minggu siti nya tadi, Ding madahka diri nemu pengundi ba dia semampai tegut nyukung iya.
Sukung tu ku iya ukai semina maya iya bediri ba PRN11 tang mega endang udah bisi maya bediri ba Pengawa Bepilih Besai sebedau nya.
“Aku minta sukung kita ngagai aku mengkang bisi baka sebedau tu maya PRN11 ti datai,” ku iya madah.