KGBS nerima tetiap pengawa manah KPM nyengkaum ngena bup teks digital ba sekula sekondari berengkah taun baru
KUCHING: Gerempung Pengajar Bumiputera Sarawak (KGBS) kurang arapka pemanah pangka aplikasyen bup teks digital ti diperambu dikena berengkah ari taun baru ba sekula sekondari ba serata menua.
Presiden iya, Ahmad Malie madahka pekara diasaika sida berindik ari kualiti perengka guna internet ti agi ‘lubah’ ba tebal agi sekula kelebih agi ba Sarawak.
“KGBS nerima tetiap pengawa ti manah diperambu Opis Menteri Pelajar Malaysia (KPM) nyengkaum pengawa bekenaka bup teks digital ba sekula sekondari berengkah ari taun baru.
“Tang KGBS kurang arapka penemban aplikasyen nya laban kualiti perengka guna internet ba sekula kitai enda laju,” ku iya madah ngagai Utusan Borneo kemari.
Berindik ari nya ku iya, KGBS irau deka bisi penanggul bekaul enggau bup teks digital nengah chara PDF (Fortable Document format) ketegal pengelubah internet.
Nya alai ku iya, enti KPM agi keran bejalaika perambu bup teks digital berengkah ari taun 2019, KGBS ngansak ngambika kualiti internet datai ba tikas efisien dulu agi, kelebih agi ba sekula Sarawak enggau Sabah.
Tang KGBS kurang arapka penemban aplikasyen nya laban kualiti perengka guna internet ba sekula kitai enda laju. Ahmad Malie Presiden KGBS
Taja pia, iya ngaku perambu KPM nya pritikal amat laban tu meransang bala nembiak bekenaka kereban digital ti udah lama dikembuan sida.
“Ke amat, langgur penemu bejalaika bup teks digital tu udah lama bisi kenyau ari beberapa taun lebuh KPM di baruh pegai perintah sebedau tu.
“Ketegal kualiti internet ba sekula agi ba tikas ti enda efisien, KPM nangguhka dulu pejalai pengawa ngena bup teks digital ti ditimpuh berengkah dikena taun baru,” ku iya.
Nitih ku, ba penemu KGBS, bup teks konvensional manah agi enggau justifikasi iya ti autentik enggau info meruan dibida bup teks digital ti enda entu likun laban tau diseruri raban pakar teknologi pemadah enggau penyambung (TKM).
Ku iya nambah, ba pengawa KPM bisi juluk ngena gajet canggih baka tu, KGBS ngingatka tikas pengelikun dokumen mega patut dipe- runding.
Apin lama ke udah, Sapit Menteri Pelajar, Teo Nie Ching madahka sekula sekondari ba menua tu deka berengkah ngena bup teks digital taun baru.
Ku iya, bala nembiak tau matak bup teks sida nengah chara PDFlalu dikena ngepun, iya semina deka dikena nembiak sekula sekondari aja.
Penerang ngenyit ari Teo udah nerima bemacham timbal kelebih agi ari serakup ti ngarika raban pengajar enggau apai indai.
Kemari, Gerempung Pengajar Sarawak (KGS) nengah Presiden iya, Macky Joseph madahka pengawa bejalaika bup teks digital mesti siti pilih ukai nya mesti dikena.
Ku iya, pengawa bejalaika bilik kelas digital patut berundingka gaya infrastruktur digital enggau perengka guna pemun ba sesebuah sekula.
Laban ku iya, bisi sekula ti repok enggau agi suntuk perengka guna pemun.
“KGS nerima langgur penemu tu tang pengawa bejalaika iya patut dipeda silik laban kandang diatu, ukai semua sekula sedia meri bilik kelas digital, ke alai semua nembiak tau akses ngagai e-bup teks,” ku iya.
Menteri Dagang Temuai, Seni, Main Asal, Nembiak enggau Lumba Dato Sri Micheal Manyin Jawong mega madahka e-bup teks enda ulih dipejalai ba Sarawak laban penanggul internet ba sekula nengeri tu.
“Tu enda engkeman ungkup Sarawak laban bup teks digital tu mesti dibatak. Sekalika semua bup teks digital ke bisi ungkup dibatak?
“Tu langgur penemu ti manah, tang ukai diatu tauka jam besemak,” ku iya.