Semua ADUN GPS nerima agih RM1 juta kena mantu rayat nyeleti enggau ngentak rumah baru
LAWAS: Perintah Nengeri bisi ngungkupka agih belanja bela penyampau RM1 juta ngagai genap iku Kaban Kunsil Nengeri ( ADUN) Gabungan Parti Sarawak (GPS) dikena nyeleti enggau ngentak baru rumah enggau rumah panjai ba kandang menua dipegai sida di baruh program dipelanja nengeri tu.
Tu dikena nimbal pemutus ngenyit mutung ari belanja perintah besai di baruh program tu ungkup peminta ti dikemendarka perintah sebedau tu, lalu Perintah Sarawak ngasaika bisi peminta kritikal ba serata nengeri sereta mutar enggau nadai betangguh.
Sapit Kepala Menteri enggau Menteri Kedua Pemansang Mengeri Enggau Pengeraja Asal, Datuk Amar Awang Tengah Ali Hasan madahka belanja tu udah dikemendarka Kepala Menteri Datuk Patinggi Abang Johari Tun Openg enggau kabinet nengeri dikena nangkup peminta ba renggat baruh nengeri tu.
“Ba Bukit Sari, aku udah ngerah tetiap sen ari belanja tu deka dikena datai ba ujung taun tu nengah pengawa beripai ngaul peranak genturung pendiau lalu pemendar belalauka pengawa meresa dipejalaika Opis Pelilih, bala komuniti enggau ketuai genturung pendiau enggau Palan Servis ADUN Bukit Sari,” ku iya.
Awang Tengah, ti mega Menteri Industri enggau Pemansang Pengawa Dagang (MIED) enggau ADUN Bukit Sari mansutka pekara tu lebuh ngelancharka Projek Mit Pemansang Menua Pesisir – Nyeleti enggau Ngentak Baru ( MRP- PPRMS) ba Kampung Tanjung di Trusan kena Hari Minggu.
Renggat keterubah ba Bukit Sari ngaul 60 buah rumah diungkup di baruh program dipelanja nengeri lalu dikemerat belalauka komiti ti meresa ungkup raban tasah angus enggau rumah repok ti patut diseleti enggau jampat.
Iya meri jamin ngagai sida ti apin disengkaum nama deka dipasuk ba lis renggat kedua pejalai projek tu dikena ngelempungka tating penusah sida enggau peminta rumah ti patut nerima bantu ari perintah nengeri.
Sarawak ku iya, bisi enda entu nemu nasit sida ti minta ti beguna amatka bantu nyeleti rumah tauka ngentak baru berindik ari ubah ngagai perintah Pakatan Harapan (PH) ba Putrajaya, kelebih agi peminta ti udah dikemendarka sebedau tu.
Komiti Bukit Sari diketuaika Kaunsilor Awangku Jinal Abidin Pengiran Jawa, agih belanja ti ditetap ungkup nyeleti rumah repok dipejalai di baruh pengawa beripai ngambika ngemai pangka pemadu manah.
Ku Awang Tengah, belanja ulih dikelimat mayuh agi sereta seriris enggau ngemai pemaik ngagai penyereta dibida enggau pengawa dipejalai raban kunteriktor nengah pengawa konvensional ti ngaul margin penguntung.
Taja pia, tu deka tepulai ngagai ADUN GPS mutarka chara kereja pemadu pragmatik nentuka pejalai program lanchar enggau jampat.
Dikena nentuka komuniti menua pesisir kitai bisi akses ngagai penyikap perengka guna pemun enggau infrastruktur, pengari rayat GPS, bala ADUN enggau MP udah diagihka belanja MRP enggau RTP dikena gawaka rayat ba kandang menua dipegai sida.
Dulu ari nya, Awangku Jinal, ba jaku dipansutka iya madah raban renggat baruh empu ulih meda bala ketuai sida ti endang beratka peminta enggau juluk sereta bejalaika pengawa nitihka jaku pulaika pemaik ngagai sida.
“Rayat patut nemu kuing sida lalu milih nyukung ketuai enggau perintah ti dikelala sida, ukai bala ketuai ti semina mandangka diri maya bepilih aja,” ku iya.
Iya madahka Awang Tengah udah bisi rikod manah nyadi pengari rayat ba semua penggal, gawaka peminta sida nengah madat ti diberi.
Sama bisi datai MP Lawas Datuk Henry Sum Agong, Pemesai Pelilih Lawas Ladin Atok, bala ketuai renggat baruh PBB Bukit Sari, bala ketuai komuniti enggau penerima ari Pelilih Lawas di baruh program MRP-PPRM renggat keterubah.