Kaban MP PH lebih agi ari Sarawak patut nentuka penyampau bayar diberi Petronas asil ari minyak enggau gis
KUCHING: Sapit Kepala Menteri Tan Sri Datuk Amar Dr. James Jemut Masing madahka Kaban Parlimen (MP) Pakatan Harapan (PH) kelebih agi ari Sarawak nitihka pematut nentuka penyampau bayar diberi Petronas ngagai Sarawak, asil ari industri minyak enggau gis, ukai nyebut pekara bukai.
Iya nyemetak madah minyak enggau gis endang 100 peratus keresa enggau reta Sarawak.
“Nama kebuah aku patut nyebut pasal penyampau peratus royalti enggau bayar pemansut minyak enggau gis ngagai Sarawak.
“Minyak enggau gisi iya nya keresa Sarawak, reta Sarawak. Bala MP PH patut nentuka berapa mayuh penyampau ti patut diberi Sarawak ngagai Petronas, ukai nyebut pekara bukai,” ku iya nandu.
Iya mansutka jaku nya ngelansa penerang ari Chairman PH Sarawak Chong Chieng Jen rambau aum pengarang berita pagi kemari.
Masing ti nyadi Menteri Pemansang Infrastruktur enggau Perengka Pengangkut sereta Presiden Parti Rakyat Sarawak (PRS) madahka PH Sarawak agi enda meretika pekara nya lalu puntan nyaga pemerat Sarawak.
“Minyak enggau gis iya nya reta Sarawak! Kitai ti meri (penatai pemisi) ngagai Petronas lalu ukai Petronas ti meri kitai!
“PH puntan meretika peka- ra tu. Tu pemuntan sida nyaga pekara berat ungkup Sarawak,” tandu iya.
Ba lansa bukai, Masing enggai ngelansa pasal jamin Chong, ke alai Sarawak enggau Sabah deka nerima 30 peratus ari belanja pemansang di baruh Bajet 2019 ti deka dibantaika Menteri Besai Tun Dr. Mahathir Mohamad ba Parlimen kena 2 November tu.
“Aku semina deka ngelansa pasal bajet perintah besai pengudah dibantai laban aku enggai berandau bepelasarka peragam aja,” ku iya.
Chong ti mega Sapit Menteri Dagang Dalam Menua enggau Orang Bebelika Barang madahka agih 30 peratus ari belanja pemansang menua ungkup Sabah enggau Sarawak di baruh Bajet 2019 baka ti disemaya dalam Manifesto PH.
“Pia mega, agih 30 peratus tu mega belanja pemadu besai dibida bajet sebedau tu lebuh di baruh pegai Barisan Nasional (BN) pengelama 55 taun,” ku iya.
Ku iya, di baruh pegai BN, Sabah enggau Sarawak nerima agih belanja semina 10 ngagai 13 peratus aja ungkup belanja pemansang ninting taun, iya nya kurang ari 25 peratus ari kesemua belanja pemansang menua.
Ngelansa pasal formula bekunsika penatai pemisi ti diperambu PH sebedau tu, iya nya meri 20 peratus royalti minyah enggau 50 peratus chukup penatai pemisi ngagai Sarawak, ku Chong, perambu formula tu udah ditulak Perintah Nengeri.
Berindik ari nya, Perintah Besai PH udah numbuhka Komiti Pemandu ti diarika lapan pengari ari Semenanjung Malaysia enggau lapan pengari ari Sabah enggau Sarawak nyengkaum kededua Kepala Menteri.
Nyentuk Komiti Pemandu tu ditumbuh, perambu baru bekaul enggau formula bekunsika penatai pemisi, Sarawak deka terus nerima 5 peratus royalti minyak enggau gis sereta agih belanja pemansang ti besai agi.
Minyak enggau gisi iya nya keresa Sarawak, reta Sarawak. Bala MP PH patut nentuka berapa mayuh penyampau ti patut diberi Sarawak ngagai Petronas, ukai nyebut pekara bukai. Datuk Amar Dr. James Jemut Masing Sapit Kepala Menteri Sarawak