Mayuh perambu besai deka digaga perintah ungkup peranak Miri
MIRI: Dua pemansang besai, perengka guna enggau servis pengerai sereta mega rumah ungkus mudah diperambu kelebih agi ungkup Mengeri Miri disadang deka ngangkatka tikas idup kesemua peranak dia.
Kaban Parlimen (MP) Miri Dr Michael Teo madahka ba sektor pengerai, pekara dikemerat iya nya nangkir sepital besai agi dikena mutarka penanggul sekut ba Sepital Miri seraya pengawa berumah ba mengeri begunaka urung 8,000 unit rumah ungkus mudah.
“Timbal diterima ari dua projek tu endang beguna amat ngagai peranak sitak Miri tauka mengeri besai Miri.
“Pengudah perintah Pakatan Harapan (PH) mujur ngaga sepital besai agi ungkup Miri, aku orang ti pemadu iya lantang ati ba mengeri tu. Pia mega maya 8,000 buah rumah didiri ungkuo raban bepenatai pemisi baruh kelebih agi setinggan, aku mega berasai chukup lantang,” ku Teo lebuh bejadika Anugerah Penyulut SMK St. Joseph ungkup nembiak Pom 5 ba sebuah hotel ditu, malam Hari Enam.
Dr. Teo nyamin iya deka naka ulih gawa memanah nentuka dua projek besai tu dipejalaika perintah PH.
Ba atur pengerami nya, iya muji sekula ti ngatur pengawa meri basa ngagai bala nembiak ti teulihka penyulut.
“Pengawa tu patut diatur ninting taun dikena ngelala enggau meri basa ngagai bala nembiak ti deka napi peresa SPM.
“Dikearap pengawa nyuaka tanda basa tu ulih ditampung dudi hari laban tu chara meri peransang ngagai bala nembiak ngulihka pemujur ba peresa SPM. Tambah mega, sida ti deka napi peresa mega dipelaba deka nambahka pengandal ba diri empu napi pemar enggau penekul dudi hari,” ku iya.
Kelimpah ari nya ku iya, pengawa baka nya nerenakka semengat kerejasama enggau neguhka tanggam kaul antara nembiak, apai indai enggau sekula, ti manah dikena nambahka kualiti pelajar.
Dr. Teo mega bekunsika peneleba diasaika iya lebuh nampung pelajar tinggi, jauh bida rampa ke alai bala pengajar enggau nembiak tauka pengelicha rat agi kaul enti dibida enggau jeman sekula sekondari.
“Kita deka tinggal kediri enggau bantu mimit ari pengelicha ti semina meri licha aja.
“Tang laban keran deka idup enggau pas peresa, kita ukai belajar 24 jam, tang kereja rat enggau bala senior kita. Sida tu ti deka ngembing kita pasal pekara ti beguna ngambika dipelajar dikena pas peresa,” ku iya.
Dulu ari nya ba jaku dipansutka iya, Prinsipal Sekula, Ng Meng Heong madahka sekula nyulut kenyau ari enam taun ke udah, iya mangku pengawa nyadi prinsipal dia udah mujur amat.
Ku iya, penyapai pemadu manah dalam taun 2014 lebuh sekula nyapai gred purata SPM was 4.29 peratus dibida enggau 5.72 dalam taun 2012 enggau 5.516 taun 2013.
Ku iya, penyulut besai ti dijapai ngujungka iya nerima anugerah khas lalu udah nya setengah ari nembiak ari SJK (C) Chung Hua mindah ngagai SMK St. Joseph.
“Semua pemujur tu asil pengawa begulai bala pen- gajar, nembiak enggau apai indai. Kami ngarapka gaya ulah manah baka nya ulih ditampung, enti enda ulih ditan,” ku iya.
Berebak enggau nya, 185 iku nembiak nerima anugerah, nyengkaum tujuh anugerah khas, pemadu tinggi, Anugerah YB Dr. Michael Teo ti diberi ngagai Michelle Ling Xin Hui (5C).