Resolusyen 90 tau diserenih ke pemaik orang indu, pengaji
MIRI: Serikat peribit ti enggai ngena resolusyen 90 hari kemisi beranak ungkup staf indu sida, patut berunding baru ke pekara nya lalu ngiga chara mutar ti tau meri pemaik ngagai kededua piak.
Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Dato’ Sri Fatimah Abdullah madahka resolusyen nya agi tau diserenih raban serikat lalu iya andal bisi pemutar ba pekara nya, ti nguntung lalu ukai niat deka nating sebarang raban.
“Gaya pekara tu agi tau dikemanah lalu raban serikat patut beratika siti pemutar ti meri pemaik ngagai kededua pia, bela untung, laban Perintah Nengeri diatu mega udah bejalaika kemisi 90 hari ngagai indai ti baru beranak,” ku iya.
Iya mansutka jaku nya ngagai pengarang berita ditu kemari lebuh dipinta ngelansa pasal tebal agi serikat peribit enggai meri kemisi beranak nyentuk 90 hari ngagai staf indu laban bisi ngumbai tu nating enggau ngerugi sida.
Minggu nyin tadi, Sekretari Besai Gerempung Dagang Sarawak, Jonathan Chai madahka resolusyen nya nyerenih kemisi beranak pengelama 60 hari ungkup sektor korporat, nambah ngagai 90 hari, deka nating raban pengaji.
“Tu deka nating amat berindik ari gaya ekonomi diatu majak labuh lalu ungkus bejalaika dagang majak niki ba menua tu.
Polisi baru tu tau diterima pekereja indu tang pekara enda deka nyadi manah ungkup sektor dagang laban perintah baru deka nyerenih penyampau gaji pemadu mit apin lama ke udah,” ku iya ba siti surat berita ti dikeluarka The Borneo Post kena Hari Dua tu tadi.
Iya mega irauka pengawa deka nempa sektor korporat mesti nunda sektor perintah meri kemisi beranak 90 hari deka ngurangka pengawa nambahka produktiviti dagang sida.
Ku iya, nyangka mega deka ngurangka tikas daya besemekih raban dagang Malaysia dibida enggau raban ti sama gawa enggau sida ba rantau tu.
“Kami nadai penanggul meri sebarang langgur penemu tauka polisi ti tuju deka nambahka agi pengelantang bala pekereja kami tang masa nyadi pugu pekara beguna amat diperundingka,” ku iya nampung.
“Naka diatu, aku enda nemu sebarang serikat ti meri pekereja lelaki kemisi seraya bini sida bisi kemisi beranak,” ku iya rambau randau khas begulai enggau The Borneo Post nya.
Langgur penemu nyerenih baru kemisi beranak ungkup sektor korporat udah dipejalai lebuh Kajian Separuh Jangka Rancangan Malaysia Ke-11 2016-2020, minggu nyin tadi.