Komiti MA63 deka nentuka pemutus bepanggai ngagai penau pengari mantai enggau nyemetak peminta nengeri tu
KUCHING: Komiti Pemandu Meresa Sempekat Malaysia 1963 (MA63) enda ngaga pemutus belalauka undi majoriti tang bepanggai ba penau pengari Sarawak mantai enggau nyemetak peminta nengeri tu.
Chairman Pakatan Harapan (PH) Sarawak Chong Chieng Jen madahka penyampau pengari ari Sarawak ba Komiti Pemandu MA63 ukai pekara besai tang penau Kepala Menteri Datuk Patinggi Abang Johari Tun Openg enggau Luyar Besai Nengeri Datuk Talat Mohmood Abdul Rashid mantaika nyemetak peminta Sarawak.
“Semua penanggul tu datai ari ulah (ketuai) Barisan Nasional (BN), diatu Gabungan Parti Sarawak (GPS), sida seruran berundingka majoriti deka ngaga pemutus, pekara tu nyadi ba Aum Kunsil Nengeri (DUN).
“Ba DUN, sida seruran ngembuan penemu majoriti ulih ngalahka minoriti, nya kebuah, maya iya (Abang Johari) ba piak minoriti, iya deka kekapa sereta sebedau Komiti Pemandu baum keterubah, iya baka ‘ngeri’,” ku iya.
Chong ti mega Sapit Menteri Dagang Dalam Menua enggau Orang Bebelika Barang mansutka pekara tu lebuh dirandau pengarang berita pengudah ngemata pengawa nyain Sempekat Pemereti Ati (MoU) antara beberapa serikat ba Sentosa Parade di Kota Sentosa semak ditu, kemari.
Nitih ku Chong baka sebedau tu, semina bisi dua tauka tiga aja pengari ari Sarawak nyengkaum iya empu ba randau nentuka penyampau royalti minyak enggau gis dibayar ngagai Sarawak tang sida mujur meri pengandal ngagai komiti (PH) nya.
“Aku enda nemu nama kebuah sida (Perintah Nengeri Sarawak) nulak kangau tu, nyangka ketegal pengelawa sida tauka langgur penemu nya datai ari aku,” ku iya.
Nya alai ku iya, Abang Johari patut bejalaika pangku pengawa iya nentuka peminta Sarawak aba Komiti Pemandu Meresa MA63 ukai nya ‘irau’ taja sebedau komiti tu ngatur randau keterubah.
Chong madahka Abang Johari patut mantaika peminta Sarawak ba ti disempekat ba MA63 kelebih agi bayar royalti minyak ngagai nengeri tu pengudah perintah nengeri nulak langgur penemu perintah PH sebedau tu.
“Bayar royalti minyak enggau gis sepenyampau 20 peratus dibida 5 peratus diatu enggau 50 peratus chukai penatai pemisi ti digempung ba Sarawak diberi ngagai perintah tu endang bisi ba manifesto kitai (PH).
“Taja pia Perintah Nengeri Sarawak enggai nerima langgur penemu tu ngujungka pekara tu dibai baru ngagai Komiti Pemandu Meresa MA63.
“Iya (Abang Johari) begulai enggau Luyar Besai Nengeri bisi ba komiti tu, nya alai, tepulai ngagai iya madah nyemetak pasal peminta Sarawak,” ku iya.
Komiti Pemandu nya diperambu Menteri Besai, Tun Dr Mahathir Mohammad, dikena nyapai agih ti disempekat ba MA63 nyadi nyata, lalu iya meda dipadu nyadi chairman komiti nya.
Kaban komiti nya iya nya Menteri Pekara Ekonomi, Datuk Seri Mohamed Azmin Ali; Menteri Wang, Lim Guan Eng; Menteri Komunikasi enggau Multimedia, Gobind Singh Deo; Menteri Perengka Pengangkut, Anthony Loke; enggau Menteri Luar, Datuk Saifuddin Abdullah.
Bala ketuai ari Sabah enggau Sarawak ti dipadu nyadi kaban komiti tu nyengkaum Menteri ba Opis Menteri Besai, Datuk Liew Vui Keong; Menteri Kereja Raya, Baru Bian; Menteri Dagang Antarabansa enggau Industri, Darell Leiking; Abang Johari enggau Kepala Menteri Sabah, Datuk Seri Mohd Shafie Apdal.
Bala pemesai tetinggi perintah ti mangku pengawa komiti tu nyengkaum Ketuai Sekretari Menua Datuk Seri Ismail Bakar; Ketuai Akim Sabah enggau Sarawak di Istana Kehakiman, Datuk David Wong Dak Wah; Luyar Menua Tommy Thomas; Luyar Besai Nengeri Sarawak, Datuk Talat Mahmood Abdul Rashid; enggau Luyar Besai Nengeri Sabah Zaleha Rose Pandin.
Ba DUN, sida seruran ngembuan penemu majoriti ulih ngalahka minoriti, nya kebuah, maya iya (Abang Johari) ba piak minoriti, iya deka kekapa sereta sebedau Komiti Pemandu baum keterubah, iya baka ‘ngeri’. Chong Chieng Jen Chairman PH Sarawak