Tiga ruang bilik peranak Rh Martin, Merindun deka dibantu rumah baru
LUBOK ANTU: Tiga ruang bilik seranta ba Rumah Martin Lebi, Merindun deka ngasaika pengidup meruan agi pengudah rumah repok endur sida diau ngelama tu deka diseleti nyadi rumah entap malai tanah.
Pekara tu dikemendarka Kaban Kunsil Nengeri (ADUN) Engkilili Dr Johnical Rayong Ngipa, lalu belanja datai ari agih belanja khas di baruh projek nyeleti ti dikemendarka Kepala Menteri Datuk Amar Abang Johari rambau aum DUN tu tadi.
“Aku tekenyit sereta sinu laban agi bisi peranak di baruh sitak Engkilili idup seranta enggau pendiau rumah baka tu, aku berasai asa laban laun dipadah pasal gaya pendiau sida,” ku iya.
Dulu ari nya, iya ba atur pejalai gawa ngagai Rumah Awing, Merindun, udah dipadah pasal tiga ruang bilik ti seranta lalu tekala nya bejalai ngabas rumah ti dipadah.
Dr Rayong ngerah Pemantu Khas iya, Nancy Rangkong enggau Chairman Serakup Bala Tuai Rumah DUN Engkilili TR Johnson Damu mantu enggau nyendiaka ramu dikena berumah.
“Berindik ari nya, bilik bukai ba rumah panjai ti sama bela dibantu ngena belanja khas ngambika kualiti idup sida ulih diangkat sereta ulih diau ba rumah ti lantang,” ku iya.
Dua buah rumah ti diuwan orang tuai sereta diau kediri lalu sebuah agi diempu Orang Nyelai Pendiau ( OKU) ti puntul kededua kaki iya.
“Nyadi penerima seranta nya dua iku diri menyadi ke mega udah balu, iya nya Senin Labang enggau Muna Labang. Lalu siku ke tim- pang pendiau iya nya Jebing Sangau. Diatu iya ditetak kededua kaki ketegal penyakit kemi manis.
Ngelansa silik, Dr Rayong madah deka mantu genap iku peranak Engkilili nadai ngira bansa enggau pengarap sereta nadai raban deka dikelaung ari nerima bantu, ti setipak enggau atur sereta begunaka bantu jampat.
“Tu mega seriris enggau tuju, juluk enggau pengarap perintah nengeri di baruh pegai Abang Johari ngemeratka pemansang menua pesisir nyengkaum pminta rama rayat Sarawak,” ku iya.
“Setipak amat enggau rambai jaku kitai, semina parti enggau ketuai Sarawak aja nemu sentimen enggau peminta rayat nengeri tu lalu ukai parti ari luar Sarawak,” ku iya madah nyemetak.
Program walkabout nyata meretika pemerinsa rayat, ku Dr Rayong madah ngagai Utusan Borneo.
Bisi nyempulang iya bejalai ngabas iya nya Nancy Rangkung, TR Johnson, bala tuai rumah sereta bala bukai.