Urung 650 penyereta ngambi bagi FMM Sarawak Run 1.0 diatur di Kuching
KUCHING: Urung 650 iku ari semua serak idup ngambi bagi ba Federation of Malaysian Manufacturers (FMM) Sarawak Run 1.0 diatur beserimbai enggau pengawa ngintu genap taun Ke- 50 FMM ensana.
Sebagi ari bayar penyereta sepenyampau RM1,226 diberi ngagai Kuching Life Care Society.
Presiden FMM Dato Soh Thian Lai lantang ati meda bala penyereta rinduka aktiviti bepengerai seraya ngaul diri ba pengawa pengasih.
“Kuching Life Care Society iya nya gempung bejalaika pengawa pengasih ti nyendiaka pengawa ngintu enggau nyukung sida ti sakit, bala kita ngereja pengawa pengasih seraya belanda ungkup pengerai,” ku iya sebedau ngelepaska pelanda urung pukul 6.30 pagi.
Soh mega ngenataika tabi puji ngagai raban ti melanja sereta mega Majlis Bandaraya Kuching Selatan (MBKS), City Jogger’s Club enggau Polis DiRaja Malaysia (PDRM) ti udah ngemujurka pengawa tu.
Raban ti melanja iya nya Pico Food, Dahfa, Tech Lee Seng Coffee, Banana Tree and Nestle, sereta bala kaban federasyen.
Sesi Zumba dikena ngangatka isi bala penyereta diatur urung pukul 6 pagi dientudika pengawa ngenukuka penatai sebedau sida dilepas.
Ngarika pengawa nerima chek ari Soh iya nya pengari ari Kuching Life Care Society, Amanda Chua.
Pelanda udah dibagi ngagai dua kategori iya nya pekit pelanda 7km ti nyendiaka perais manah ngagai pemenang enggau pelanda lantang 3km.
Ditumbuh dalam taun 1968, FMM ngarika lebih 10,000 kaban kompeni ari rentayan bekal kilang.
Federesyen chakah gawa ngaul perintah enggau ejensi besai sida ba renggat perintah besai, nengeri enggau tikas menua tu kelimpah ngemeranka kerejasama rat enggau gempung antarabansa enggau dagang Malaysia.