Program keterubah diatur PH Baram di Pasar Lapok nerima timbal manah
MIRI: Program Nanggam Kaul Pakatan Harapan (PH) Baram enggau Rayat Baram keterubah diatur ba Pasar Lapok, Tinjar semak ditu, Hari Minggu tu tadi, nerima timbal manah amat ari peranak menua nya, ti agi gagitka perintah baru diketuaika PH.
Program diatur ba Balai St Anthony, digulu lebih 400 iku penyukung PH enggau peranak menua nya ti deka ngulihka penerang pemadu baru pasal polisi perintah baru kelimpah beberapa renggat licha bukai ti ngemai pemaik ngagai sida.
Pengatur Program, Elias Lipi Mat, madahka tuju program nya nanggam rat pemanah kaul enggau kerejasama rat antara bala ketuai PH kelebih agi ari Parti Keadilan Rakyat (PKR) Baram enggau peranak dia, ti nitihka perambu tembu pukul 4 lemai, tang dilanjar nyentuk pukul 5.30 lemai laban timbal manah amat ari mensia mayuh.
Ku iya, kelimpah mendingka licha ti bisi dikenatai, bala sida mega bela ngambi bagi ba randau tanya saut, deka nemu penerang nyemetak agi.
“Beserimbai enggau atur pogram nya, kami meri penerang senentang atur pengawa bepilih penuduk PKR Pampang Baram, ke alai Ketuai Pampang Baram sebedau tu, Roland Engan, ngetanka penuduk iya, menang di darat,” ku iya.
Seraya bepilih penuduk sapit ketuai pampang ti direbut Paul Baya enggau Boyce Ngau Anyi lalu penuduk mandak ketuai PKR Pampang Baram, bepadan antara Elias Lipi Mat enggau Catherine Jok.
“Tuju kami nerangka penuduk enggau sapa bagi bediri minta pilih ngambika sida nemu penerang pemadu baru enggau betul, kelimpah ngasuh sida meretika atur pejalai pengawa bepilih penuduk ila, pangku pengawa enggau pengawa sida ti menggi penuduk nya,” ku iya seraya nambah, penerang nya nyata meri pemereti enggau diterima sida ti datai.
Iya ngaku taja mayuh ari sida nya nyukung PH, tang agi bisi sida baru nemu isu bepilih ketuai, nya kebuah penerang nya beguna amat ngagai sida.
Pia mega ku iya, raban pengatur bisi ngangauka Ketuai Polis Pelilih (KPD) Baram, DSP Gabriel Risut, meri licha pasal pengawa nagang penyalah ba Baram.
“Kitai mega bisi ngangauka luyar bepeneleba, Harrison Ngau, ngetuaika randau pasal tanah Adat Bansa Asal (NCR) begulai enggau peranak Tinjar enggau Baram,” ku iya seraya nambah, randau nya dientudika tanya saut laban mayuh bala deka nemu pasal status tanah NCR sida ti diaku perintah.
Ku Elias, berindik ari timbal manah amat ba atur program keterubah, raban sida merambu deka ngatur program ke sama taun baru, deka mayuh agi ejensi dikangau ngemujurka licha enggau rayat ti beguna amat ungkup rayat dia.