Taja napi pemar laban nengeri tu besai, perintah nengeri komited nyediaka infrastruktur ke pengelantang di menua pesisir
KOTA SAMARAHAN: Perintah nengeri betapi enggau pemar besai ngemansangka Sarawak laban nengeri tu besai.
Kepala Menteri, Datuk Amar Abang Johari Tun Openg madahka nya alai diatu pekara ke pemadu dikemeratka perintah nengeri iya nya mutarka penanggul bekal ai beresi enggau kuasa karan ba kandang menua ulu tauka menua pesisir.
Iya madahka, ke tuju nya perintah nengeri udah ngemendarka ungkup belanja RM11 bilion, ti pemadu tinggi dalam rikod belanja pemansang Sarawak dalam timpuh dua taun ke deka datai.
“Dalam pengeran tauka pemendar perintah nengeri deka ngenyakahkka pemansang digital, pemansang di kandang menua pesisir enda kala ditinggalka.
“Perintah nengeri komited nyendiaka infrastruktur ba kandang menua pesisir enggau ngemodenka bidang betanam betupi ti mai kuing ngagai pemansang nengeri tu,” ku iya.
“Iya mansutka pekara nya lebuh bejaku ba sidang kedua Konvokesyen Ke- 22 Universiti Malaysia Sarawak (UNIMAS) ba DeTAR Putra, UNIMAS ditu, kemari.
Ngenang pasal Revolusi Perindustrian 4.0 (IR4.0), Abang Johari madahka Sarawak mega betapi enggau empas IR4.0 sereta patut ditapi enggau penuh penausereta pengelandik.
Tu laban ku iya enggau penyampau tubuh mensia ti mimit sereta rampa menua ti besai, Sarawak enda ulih agi bepanggai ngagai strategi ungkus enggau teknologi baruh, ti ngena pengereja pengawa berat dikena ngangkatka penumbuh ekonomi.
“Meda ngagai peminta enggau guna nya, perintah nengeri sehari tu benung bebendar ngemansangka infrastruktur internet ti deras dikena nyukung Ekonomi Digital Sarawak.
“Diatu, kitai patut nyingkang enggau lengkas ngambika terus relevan enggau peminta kemaya hari. Nya alai, perintah nengeri udah ngungkupka RM1 bilion dikena ngemanahka infrastruktur ICT ba nengeri tu,” ku iya.
Nambahka nya iya madahka, pemansang Kampung Digital ba Sama Jaya, Pusat Inovasi Sarikei sereta numbuhka Bank Pembangunan Sarawak ( DBOS) enggau Lembaga Multimedia Sarawak (SMA) dipelabaka deka ngenyampat enggau ngeranchakka agi polisi ekonomi digital ba nengeri tu.
Kelimpah ari nya, UNIMAS bejalaika tanggungpengawa beguna dalam pemansang ekonomi digital Sarawak sereta dikearapka perintah nengeri nyadi pun ‘ Pusat Kecemerlangan’, ti nyadi ejen keterubah awakka aktiviti pemansang pemansik enggau teknologi dipejalaika ngena chara holistik.
“Aku pechaya tanggungpengawa sereta sukung universiti tu ngagai nengeri Sarawak deka nambah ninting maya.
“Seraya enggau tu aku ngarapka UNIMAS Water Desalination Laboratory deka bejalaika pansik dalam ‘penyahgaraman’ ai masin dikena ngasilka ai tabar chakah agi dipejalaika awakka ulih meri penguntung ukai semina ngagai raban bansa menua tu tang ulih dikunsi sereta dijual ngagai renggat antrabansa,” ku iya.
Ngagai bala graduaet, Abang Johari madahka sida patut besedia betami pemansang teknologi enggau ubah gaya idup raban bansa laban kitai enda ulih agi ba ngemeranka chara lama laban dunya udah ngemeranka ubah teknologi ti dikena jemah ila.
“Kena enggau manah semua penemu ti diulih ngelama tu, ngerebut pelung adala ekonomi baru.
“Ba Sarawak pengerembai ekonomi nengeri majak ranchak nengah sekeda projek pemeranak puku ari menua luar ti bisi pengerindu bepalan ba Sarawak,” ku iya.
Kemari hari ke kedua pengerami Konvokesyen UNIMAS Ke-22 ti bisi iya nya sidang dua enggau tiga.
Bisi 1,731 iku graduet ari lima fakulti di UNIMAS nerima setipikit sida lalu ba sidang pagi (kedua) 517 graduet ari Falkulti Sains Kognitif dan Pembangunan Manusia (FSKPM) enggau 375 ari Fakulti Sains Komputer dan Teknologi Maklumat (FSKTM).
Pengawa nyuaka ijazah ngagai bala graduet sidang kedua iya nya disuak Abang Johari ke nyadi Pro Canselor UNIMAS.
Sidang ketiga bisi 839 iku graduaet nerima ijazah ari Falkulti Sains Sosial dan Kemanusiaan (FSSK), Fakulti Perubatan dan Sains Kesihatan (FPSK) enggau Fakulti Bahasa dan Komunikasi (FBK).
Pro Canselor UNIMAS Datuk Patinggi Tan Sri (Dr) Alfred Jabu Numpang nyuaka ijazah ngagai bala graduet.
Dalam pengeran tauka pemendar perintah nengeri deka ngenyakahkka pemansang digital, pemansang di kandang menua pesisir enda kala ditinggalka. Datuk Amar Abang Johari Tun Openg Kepala Menteri