UNIFOR dikena nyaga pemaik, pengelantang pupu bansa di Sarawak
KUCHING: Penumbuh Unit Hal Ehwal Agama-Agama Lain (UNIFOR) enda patut disalah reti nyengkaum ba sida bansa Melayu laban nya dikena nyaga pemaik enggau pengelantang pengidup pupu bansa ba nengeri tu.
Sapit Kepala Menteri, Datuk Amar Awang tengah ali Hasan madahka, raban bansa Melayu patut ngeringka hak enggau enda nyeliahka hak orang bukai.
“Penumbuh UNIFOR anang meh disalah anggap. Tuju penumbuh UNIFOR nya dikena nyaga pemaik enggau pengelantang pengidup raban bansa ti mayuh jalai pengarap, adat enggau main asal sereta penatai asal ti bebida ba nengeri tu.
“Ba Sarawak, kitai idup pupu bansa sereta nadai siti bansa ti ulih merintah enggau mutlak kelimpah ari kitai nempa kerejasama entara pangan diri,” ku iya.
Iya mansutka pekara nya lebuh bejadika ‘Seminar Budaya Melayu Sarawak Ke-7’ (SBMS7) ti diatur AKYBMS ti digulu direktor besai ke mega chairman pengatur Datu Dr Sanib Said ditu, kemari.
Awang Tengah madahka, raban bansa Melayu patut beserakup sereta bekerejasama enggau bansa bukai ba nengeri tu ti ngemeratka semangat bekelala sereta mentas entara bansa.
“Ari segi penyerakup entara raban bansa Melayu ba Sarawak nya nyadi kunchi pemujur kitai ngelama tu. Tang pekara tu anang dipeda enggau mudah.
“Kitai patut meda dini pengelemi ke alai dini ke charik patut dijait baru, ke redak patut dipateri, awakka penyerakup kitai seruruan tegap,” ku iya.
Kelimpah ari nya, iya ti mega Menteri Pemansang Mengeri enggau Pengaraja Asal II madahka, perintah nengeri nyamin deka nerus ngaku pengempu tanah nengah pengawa meri surat pala tanah ngagai raban bansa Melayu ba Sarawak.
Ku iya, nya dikena nentu tanah nya ngembuan rega tinggi mantu raban bansa nya sereta program Penyukatan Kampung Tradisi deka dipajakka.
“Diatu genturung pendiau dalam mengeri Kuching ke dulu suba nadai suarat pala tanah, diatu udah bisi. Nya asil ari program nyukat ba genturung pendiau ke alai sida diberi surat pala tanah enggau nadai betimpuh,” ku iya.
Iya ti mega chairman Lembaga Pemegang Amanah, Amanah Khairat Yayasan Budaya Melayu Sarawak (AKYBMS) madahka, nya komitmen perintah nengeri dikena ngaku genturung pendiau raban bansa Melayu ti endang udah lama ditumbuhka.
“Perintah nengeri nengah Pelan Pembangunan semua Bandar mega udah meri kelala sekeda inisiatif dikena orang Melayu ngambi bagi dalam bidang pemansang reta tanah sida.
“Tu dikena nentuku orang Melayu agi ngembuan aset ba palan strategik ba dalam mengeri,” ku iya.
Sama bisi datai Menteri Dagang Temuai, Seni, Main Asal, Nembiak enggau Lumba enggau Main Asal, Datuk Abdul Karim Rahman Hamzah, Menteri Muda ba Opis Kepala Menteri (UndangUndang, Kaul NengeriPerintah Besai enggau Pematau Projek) Sharifah Hasidah Sayeed Aman Ghazali, Menteri Muda Pemansang Orang Dagang enggau Orang Dagang Mit enggau Tengan Pemesai (PKS)Datuk Mohd Naroden Majais, Kaban Parlimen Batang Sadong, Datuk Seri Nancy Shukri enggau Sekretari Perintah Nengeri Tan Sri Datuk Amar Mohd Morshidi Abdul Ghani.