Penerang pasal Komiti Meresa MA63 siti ‘politik murah’, ku Abang Johari

KOTA SAMARAHAN: Kepala Menteri Datuk Patinggi Abang Johari Tun Openg madahka penerang Chairman Pakatan Harapan (PH) Sarawak Chong Chieng Jen kena Hari Satu (Isnin) apin lama pasal Komiti Meresa Sempekat Malaysia 1963 (MA63) iya nya ‘politik murah’.

“Enda ibuh ngenang pasal pekara nya. Nya politik murah,” ku iya nyaut enggau pandak.

Iya ti enggai ngenang silik lebuh ti ditanya pasal penerang Chong bekaul komposisi dalam Komiti Meresa MA63 maya dikerandau raban pengarang berita pengudah bejadika sidang kedua konvokesyen Universiti Malaysia Sarawak (UNIMAS) Ke-22 ba DeTAR PUTRA UNIMAS ditu, kemari.

Chong ti mega Sapit Menteri Dagang Dalam Nengeri enggau Pekara Penguna lebuh dikerandau raban pengarang berita ba siti pengerami di Kota Sentosa madahka Komiti Meresa MA63 enda ngaga pemutus bepelasarka undi majoriti tang bepanggai ngagai pengulih tauka pengelandik pengari Sarawak madahka enggau nyata pasal peminta nengeri tu.

Nitih ku iya penyampau pengari ari Sarawak dalam Komiti Meresa MA63 ukai pekara ti patut dikemerat tang pengulih tauka pengelandik Abang Johari Tun Openg enggau Luyar Besai Nengeri ti enggau nyemetak bekaul peminta Sarawak.

“Semua penanggul tu datai laban ulah (ketuai) BN (Barisan Nasional), diatu GPS (Gabungan Parti Sarawak), sida selalu berundingka majoriti deka ngaga pemutus, pekara tu nyadi dalam DUN (Kunsil Nengeri).

“Ba dalam DUN, sida seruran bepenemu majoriti ulih ngalahka minoriti, nyadi lebuh iya (Abang Johari) ba piak minoriti, sida deka kesal sereta sebedau Komiti Meresa nya ngatur aum keterubah, iya baka ‘takut’,” ku iya.

Nitih ku iya baka sebedau tu semina ulih dua tauka tiga pengari ari Sarawak nyengkaum iya dalam pengawa berunding nentuka penyampau royalti minyak enggau gis dibayar ngagai Sarawak tang sida mujur bulih pemendar ari komiti nya (PH).

“Aku enda nemu nama sida (Perintah nengeri Sarawak) enggaika peminta tu, engka laban penengik sida tauka perambu nya datai ari aku,” ku iya.

Ku iya Abang Johari patut bejalaika tanggungpengawa nentuka peminta Sarawak dalam Komiti Meresa MA63 ukai ‘takut’ taja pan sebedau komiti nya ngaga runding keterubah.

Chong madahka Abang Johari patut madahka peminta Sarawak baka ke ditulis dalam MA63 lebih agi bayar royalti minyak ngagai nengeri tu pengudah perintah nengeri nulak perambu perintah PH.

“Bayar royalti minyak enggau gis sepenyampau 20 peratus dibandingka 5 peratus diatu lalu 50 peratus chukai penatai pemisi ti digumpul ba Sarawak diberi ngagai perintah tu endang dalam manifestoi kitai (PH).

“Taja pan perintah nengeri Sarawak enggai nerima perambu tu ngujungka pekara tu dibai baru ngagai Komiti Meresa MA63.

“Iya (Abang Johari) enggau Luyar Besai Nengeri bisi dalam komiti tu, nyadi bepanggai ngagai iya madahka enggau terang peminta Sarawak,” ku iya.