Licha pelin pemansang infrastruktur ba DUN Telang Usan, Mulu deka diatur pagila

MIRI: Bala ketuai raban bansa ari Telang Usan enggau Mulu ti deka diterang pasal pelin pemansang infrastruktur ba sitak kunsil nengeri nya dipinta datai ngulu licha ti deka diatur pagila (1 November).

Kaban Kunsil Nengeri (ADUN) Telang Usan Dennis Ngau madahka licha deka diatur ba Hotel Mega ditu, berindik ari peminta ari iya enggau ADUN Mulu, Datuk Gerawat Gala, ungkup perintah nengeri nerang ngagai ketuai genturung pendiau enggau bala pengundi bukai ba sitak dipegai sida pasal mayuh ma- cham pelin pemansang.

“Kitai ngarap pengudah ngulu licha tu, bala penyereta datai ari bala ketuai raban bansa enggau ketuai genturung pendiau ulih bekunsi penemu sida enggau lalau ti diulih sida ngagai peranak genturung pendiau bukai, ngambika semua deka sedarka pelin pemansang infrastruktur ba sitak kitai dudi hari,” ku Dennis lebuh bejaku bejadika Pengawa Graduasyen enggau Nyuaka Anugerah Nyulut Ke-33 SMK Temenggong Datuk Lawai Jau di Long San, Baram, apin lama ke udah.

Dennis nyemetak madahka projek nyambung batang paip deka nelan belanja manggai biliun ringgit.

“Kepala Menteri Datuk Patinggi Abang Johari Tun Openg udah ngemendarka penyampau belanja dilanggur dikena kitai nyeleti jalai menua pesisir.

“Sekeda genturung pendiau deka terus disikap enggau bekal kuasa karan ari solar seraya sekeda bukai deka disengkaum dalam projek palan meresi ai nyengkaum ba Long San, ke alai kereja ngaga dipelaba deka berengkah pun taun baru,” ku iya, seraya nambah, bisi mega peminta datai ari sekeda genturung pendiau ngemanahka servis arus penyambung sida.

“Berengkah ari taun baru, nengah Ejensi Pemansang Tanah Tinggi, perintah nengeri deka ngelanchar enggau chakah agi ngaga projek infrastruktur ba sitak Telang Usan enggau Mulu sereta Baram.

“Nyadi pengari rayat, kitai keran ngemai projek infrastruktur ti ulih dikemansang ba kandang menua kitai,” ku iya nambah.