60 iku nembiak Primari 6 SK Jalan Bintang udah ngulu program ‘Tautan Kasih’
MIRI: 60 iku nembiak Primari 6 ari SK Jalan Bintang (SKJB) Miri udah nemuai ngagai Rumah Orang Tuai ba Krokop ditu, keterubah sida ngambi bagi ba program ‘Tautan Kasih’, kemari.
Dua iku nembiak mega nyabak lebuh dipinta bekunsika pekara dipelajar enggau diasaika sida lebuh sesi refleksyen ba pengujung program ti diatur Komiti Pendidikan Moral sekula.
Siku ari nembiak nya, Natalie Nicol madahka iya berasai lantang, temegah sereta mega sinu laban ulih begulai enggau sida ke diau dia sereta mantu ni bagi sida ti begunaka bantu.
“Aku enda nemu nama kebuah sida (orang diau dia) ditejuka diau ditu lalu sinu mega meda sida nadai begulai enggau diri sebilik. Aku sinu ninga jaku Sister Emily Ubong (staff gawa dia) ke alai kitai patut nuaha apai indai dataika seput sida padam,” ku iya.
Sarvintirran Parthiban madahka asai ati ari penagwa mantu ba rumah nya manah lalu iya beterima kasih ngagai sekula ti udah ngemai iya lalu semua bala nembiak bukai ungkup pejalai nya.
“Aku berasai lantang mantu sehari tu (kemari) lalu aku mega nemu bala bakih bukai ngasaika pekara sama tang bisi ati kasih ngagai sida ke tuai ti diau ditu nadai diri sebilik. Tu ngasuh aku siruka kami sebilik lebih agi,” ku iya.
Nembiak bukai ti mega bekunsika penemu sama iya nya Nicole Chung, madahka diri berasai asa enggau sinu meda orang tuai dianjung ngagai rumah nya, nitihka pematut bala anak patut nyaga sida.
“Kasih amat sereta asa meda sida diau ditu, seraya bala anak nadai begulai enggau sida. Kitai patut seruran ngenang apai indai enggau sida ke tuai, kitai mesti nyaga sida laban sida udah nyaga kitai kenyau ari mit. Lebuh sida tuai, tanggungpengawa kitai nyadi anak malas jasa sida,” ku iya.
Ketuai Kelab Pendidikan Moral SKJB, Uding Anyie madahka program tu dipejalai dikena ngenegapka bala nembiak kelebih agi nembiak taun 6 ti deka nembuka pelajar sekula primari ngambi ngemeranka ulah mulia ti dipelajarka sida ba subjek Pendidikan Moral.
“Antara tuju program iya nya ngajara bala nembiak pasal tanggungpengawa, ngintu enggau ngemeranka ulah mulia baka penyiru, pengangkun enggau pengasih ngagai bala nembiak ngambika sida ulih ngemeranka pemanah ulah tu ba pengidup sida besehari sehari,” ku iya seraya nambah, Komiti Pendidik Moral SKJB, bala pengajar enggau nembiak Pendidikan Moral mega bisi nyuaka pemeri barang dikena tetiap hari ba atur program nya.
Seraya Kepala Pengajar SKJB, Ahmad Othman temegah ati meda pengawa bala nembiak nyereta program ti ngemai pengaga sida ke diau dia sereta ngerembaika ati siru lalu iya ngelalau bala nembiak bejalai baru ngabas rumah nya dudi hari.
“Tetiap pengarap minta genap iku ti arapka iya ngemeranka ulah mulia enggau tuchi, nyadi nembiak, aku ngarapka kita ukai semina mujur ba akademik enggau nyadi teladan nembiak bukai, tang mega deka mujur enggau mensia menyana ngagai diri sebilik enggau komuniti.
“Aku ngarapka program tu deka ngajar bala nembiak ngenang jasa apai indai sida lalu suah agi bejalai kita laban nyadi orang ti badas besai reti lalu mayuh pekara ulih dipelajar ari sida ke diau ditu mega,” ku iya ba atur program ti mega digulu Penulung Kanan ( Pendaftar) SKJB, Henry Madai.
Sister Emily mega ngena awak nya ngingatka bala nembiak ngenang jasa apai indai sida tauka aki ini laban bisi maya sida (nembiak) deka tuai mega.
“Aku suba kala biak baka semua kita lalu diatu aku udah tuai, lalu kita mega deka tuai. Kenang jasa apai indai tauka aki ini lalu jaga sida laban sida udah nyaga kita ari mit.
“Sekeda ari sida ke diau ditu nadai sapa-sapa, nya alai raban pengatur pengawa deka mayar kesemua belanja mati enti sema barang sapa nadai enggau sebilik mati. Nya kebuah aku meransang semua datai kitu lalu ngabas sebarang maya, nyuaka pemeri endang diterima,” ku iya.