Pemansang dalam nerenak pengelandik ngagai raban nembiak sekula mega patut diberi sebaka ba kandang menua pesisir
LONG SAN, Baram: Pemansang ba nembiak ti ngembuan pengelandik ke tinggi mesti nerima pemerat ti sama ba sekula menua pesisir, ku Kaban Kunsil Nengeri (ADUN) Telang Usan, Dennis Ngau.
Ba pekara tu ku iya, Pelajar enggau Latih Teknikal Vokasional (TVET) patut diperati sebaka enggau pelajar akademik laban nya nyendiaka bemacham peluang ba mayuh bengkah pengawa.
“Bala nembiak dipinta nyikap diri empu enggau bemacham penemu sereta pengelandik dikena nentuka pengawa nempa rebak ti pintar runding enggau ulih besemekih.
“TVET udah nyadi pelasar beguna amat ungkup pelajar ba menua kemaya hari. Nya kebuah bisi mayuh peluang direbut bala nembiak nam- pung pelajar sida pengudah nembuka sekula tinggi.
“Institut Latih Industri (ILP), kolej komuniti, politeknik enggau Institut Pengelandik Nembiak Nasional (IKBN) nyendiaka mayuh macham kus pengelandik. Bala nembiak semina milih pengelandik ti dikedeka sida ba rega ti patut,” ku Dennis lebuh bejaku bejadika Pengerami Graduasyen enggau Nyuaka Anugerah Penyulut Ke-33 SMK Temeng- gong Datuk Lawai Jau, ditu apin lama ke udah.
Dennis nyemetak madahka nguasa bemacham pengelandik enggau penau beguna amat ba jeman digital kemaya hari.
“Kena memanah awak belajar ba sekula dikena nyerungkai penau kita lalu belajar enggau rindu ati sereta nyadi pengawa ti bisi reti.
“Nadai jalai muntang deka mujur ba pengidup kelimpah ari bebendar gawa. Aku pechaya enggau pengeran kita ngiri penemu enggau nguasa pengelandik deka meransang kita nyadi orang ti nyulut, mulia enggau pegari nama,” ku Dennis, seraya nambah, bala nembiak mega mesti bisi pengirau nyendiaka diri pelin belajar sida ti ngembing sida nuju juluk enggau tuju ba idup.
Dennis mega ngarapka pe- mar enggau penusah ti ditapi bala nembiak menua pesisir maya nampung pelajar patut dikalih nyadi peransang lalu ukai penekul sida ransing agi gawa.
“Taja idup jauh ba kandang menua ulu, kitai mesti anang tinggal belakang ba pelajar baka sida ti diau di mengeri. Kitai mesti mantaika sida ba luar din, nembiak ba Ulu Baram mega ulih nyulut baka sida.
“Nya kebuah aku ngansak bala pengajar, apai indai enggau bala nembiak seruran gawa rat begulai ba pengawa ngangkatka sekula sida nyadi institut belajar ti gah,” ku iya nambah.
Sama datai Prinsipal Sekula, Rechard Emang, Chairman Serakup Apai Indai enggau Pengajar Maurice Lawai, Penghulu Anthony Kule enggau Ketuai Kampung Long San Lucia Paya.
Bala nembiak dipinta nyikap diri empu enggau bemacham penemu sereta pengelandik dikena nentuka pengawa nempa rebak ti pintar runding enggau ulih besemekih. Dennis Ngau ADUN Telang Usan