Sadia-Krian milih SMK Saribas endur ngatur ‘Program Sadia-Apan’
DEBAK: Sekula Sekondari (SMK) Saribas nyadi palan kedua di bagi menua Betong endur Sadia- Krian ngatur ‘Program Sadia-Apan’, ti mujur dipasuk 33 iku nembiak Pom 4 enggau Pom 6 Baruh, apin lama.
Chairman Sadia- Krian, Andrew Paul arap bendar program nya ulih nulung bala nembiak lebih agi sida ke Pom 6 nusun sereta ngerintaika penemu ke bisi udah ditemu kelimpah ari penemu baru ke enda kala didinga ari segi ‘Psychology’, ‘Neurosciences’ enggau ‘Pedagogy’ ke ulih dikena maya belajar ke diri.
Ku Andrew, enti ulih dikena enggau beruru, penemu nya endang manah dikena maya belajar lalu nya kebuah di orang di menua tasik bisi langgur deka ngaga penemu nya nyadi cabang baru ke dikumbai NeuroEducation ti bekaul enggau runding, untang sereta pengawa belajar.
“Enti dikena ngajar pro- gram tu dikumbai orang penemu ngajar ti nyata sereta engkeman (The Scientificially Substantiated Art of Teching).
“Tang ba program tu kitai nunda program lama ti udah dipejalaika di menua tasik tauka nengeri besai, iya nya bekunsi enggau nembiak sereta apai indai awakka ukai semina bala pengajar aja nemu.
“Laban penemu tu ukai semima beguna ngagai penga- jar ti ngajar tang mega beguna ngagai bala nembiak lebih agi maya sida belajar ngatika diri. Penemu ‘NeuroEducation’ tu besai bungkur nya tang kitai semina bekunsi penemu ti dipelabaka chukup dikena nembiak belajar ngatika diri nyentuk univerisiti,” ku Andrew.
Andrew madahka pekara nya lebuh ti ngenang pasal tuju ‘Program Sadia-Apan’ nya ke diatur Sadia-Krian.
Nambahka nya, Sybestine Gambong ke melanja program nya beterima kasih ngagai piak sekula ti udah ngemendarka program nya diatur begulai enggau Serakup Nembiak Iban SMK Saribas.
“Aku ngarapka bala nembiak ke udah nemu penemu tu ukai semina nemu aja tang mega landik ngena tauka ngemeranka maya belajar ke diri awakka sama ulih nyingkang baka nembiak bukai ngagai tikas pelajar tinggi,” ku Sybestine ke siku ari orang ke kala belajar ba sekula nya.
Kelimpah ari nya sekeda nembiak lebuh ditanya tauka diberi penemu bekaul ‘Program Sadia-Apan’ nya, bepenemu program nya muka runding sereta mantu ngena chara belajar ti muntang.
Leaayana, Gloria, Georgina , Vanessya, Jeffery Ambas, Madeline enggau Preity lebuh ti meri timbal pasal program nya madahka, sebedau nyereta program nya selalu betapi penanggul ngingat sereta enda nemu chara belajar ti muntang sereta engkeman.
“Lebuh nyereta program tu nya baru nemu bakani chara belajar ti betul enggau muntang.
“Ba program tu udah ngajar bakani chara belajar seraya bemain sereta senang ngingat,” ku bala nembiak nya seraya beterima kasih udah mai prorgam nya ke sekula.
Ba pengawa nutup program nya, Pengajar Tama beterima kasih ngagai Sadia- Krian sereta Sybestine ke udah ngatur sereta ngemujurka program nya enggau piak sekula seraya ngarapka bisi diatur ungkup renggat ke dudi ba sekula nya.