Bajet Nengeri 2019 ke pemadu besai ungkup Sarawak Bajet nya mega mandangka pengeran perintah nengeri nyanggup peminta rayat sereta ngemansangka Sarawak
KUCHING: Kepala Menteri Datuk Patinggi Abang Johari Tun Openg netapka Bajet Nengeri 2019 deka nyadi siti bajet ke pemadu besai ungkup Sarawak.
Bajet nya ku iya ,deka dibantai maya Aum Kunsil Nengeri (DUN) kena 5 November tu.
“Bajet tu deka nyadi siti rikod lalu mandangka pengeran kitai nyanggup pinta enggau peneka rayat.
“Kitai deka ngaga mayuh agi jalai sereta jematan ngambika atur penyambung kitai manah kelimpah ti nentuka mayuh agi kandang endur di nengeri tu nerima bekal kuasa leterik enggau bekal ai beresi,” ku iya.
Abang Johari mansutka jaku nya rambau bejadi Aum Antarabansa Sentang Sarawak enggau ASEAN-”Growing Together for Common Prosperity & Regional Wellbeing” ke diatur di sebuah hotel ditu, kemari.
Iya madah, kenyau ari taun 2017 perintah nengeri udah ngemendarka agih belanja penyampau RM7 bilion ungkup program pemansang di Sarawak.
“Kitai udah nusun kereja
Kitai deka ngaga mayuh agi jalai sereta jematan ngambika atur penyambung kitai manah kelimpah ti nentuka mayuh agi kandang endur di nengeri tu nerima bekal kuasa leterik enggau bekal ai beresi. Datuk Patinggi Abang Johari Tun Openg Kepala Menteri Sarawak
ngambika semua program pemansang tu ulih dikelengkas sereta dikemujurka.
“Aku dekaka semua projek ke udah dikemendar berengkah digaga ba taun baru tu,”ku Abang Johari.
Iya nambah, agih belanja ungkup program pemansang di nengeri tu nambah ari RM3.92 bilion ba 2016 ngagai RM4.29 bilion ba 2017 iya nambah RM370 juta.
Ngenang kaul ke sama, Abang Johari madah pemansang Sarawak nadai mai reti enti peranak nengeri ke nguan kandang menua pesisir mengkang tinggal.
Dikena nentuka peranak menua pesisir bela ngasaika penguntung ari pekara pemansang, iya madah tiga bengkah ejensi ke dibaruh RECODA udah ditumbuh perintah nengeri.
Ku iya, RECODA deka matau pemansang di kandang menua pesisir tauka menua ke jauh di ulu Sarawak.
“Tu mungkur pemansang ba enam pengawa ke tau ngerembaika ekonomi baka ke akuakultur, dagang temuai, pengawa kampung, kebun sawit, getah enggau bioteknologi.
“Atur ngangkatka pengawa betanam betupi nyadi pengawa dagang deka dikemerat kelebih agi ba kandang tanah tinggi.
“Tang enti kitai deka meda juluk tu dijapai, kompeni besai ari sektor peribit meseti ngambi bagi ba pengawa betanam betupi,” ku iya.