Pelajar tumu ungkup nembiak mit engkeman ke pemujur sida dudi hari

LUBOK ANTU: Penulung Direktor Opis Pemansang Mensia Mayuh ( KEMAS) Sarawak, Joseph Unsong ngingatka pengawa meri pelajar pemadu manah ngagai bala anak berengkah ari umur lima taun siti pengawa ti manah ungkup pemujur sida dudi hari.

Nya kebuah ku iya, pemujur bala anak dudi hari bepanggai ba pemanah tempa jari apai indai ngambuh ulah sida.

Iya mansutka jaku nya lebuh bejaku bejadika Majlis Anugerah Cemerlang Kanak Kanak Tabika enggau Taska KEMAS Daerah Lubok Antu Tahun 2018 bepalan ba Dewan Pemanca Chua Teng Yew semak ditu, pagi kilah ensana.

Ku iya, apai indai enda patut ngelemaika semua tanggungpengawa nyeridi bala anak sida ngagai pengajar, tang patut disan semua raban.

Iya mega meri jaku puji ngagai bala pengajar KEMAS laban puh gawa enggau enda mantul ngemansangka runding bala komuniti.

KEMAS ku iya chakah amat bejalaika tanggungpengawa sida nyadi siti ejensi perintah ti bebendar nyeridi bala anak kandang menua pesisir nyadi modal mensia menyana.

Nya kebuah ku iya, pengeran gawa ditunjukka KEMAS patut diteladan raban bukai dikena nempa modal mensia nyulut ba bemacham aktiviti non-formal baka TABIKA, TASKA enggau ke bukai.

“Enti pengawa tu seruran dikemeran, tentu Wawasan 2020 mujur nempa modal mensia bisi kualiti asil ari penyulut pelajar kemaya hari,” ku iya.

Iya andal semua raban deka seruran ngemeratka pekara ngaul pemujur bala anak sida.

Dulu ari nya, bela bisi bejaku Pemesai KEMAS Pelilih Lubok Antu, Marinda Stewart Thaim.

Iya meri tabi puji ngagai semua raban KEMAS Lubok Antu laban udah mujur ngatur program besai ti ngaul 51 iku nembiak Tabika enggau Taska ba Pelilih Lubok Antu.

Sama datai Penyelia Kanan KEMAS Parlimen Lubok Antu, Kumpang Datuk Tutong, Penyelia Pra Sekula KEMAS Parlimen Lubok Antu, Bejau Tembak serta bala staf KEMAS bukai.