Perambu nya deka dipejalaika berengkah ari taun baru lalu KGBS ngarapka peresa nya enda disilih enggau peresa bukai, ku Malie
KUCHING: Kesatuan Guru Bumiputera Sarawak ( KGBS) nyukung sereta nyambut manah perambu Opis Menteri Pelajar Malaysia (KPM) ke deka ngetuka peresa ungkup nembiak sekula Primari 1, 2 enggau 3 di menua tu, berengkah taun baru.
Presiden KGBS, Ahmad Malie bepenemu dikena mutarka isu peresa nya ba menua tu, KPM tau enda ibuh nganti peresa nya ngena peresa bukai awakka jemah ila peresa ungkup Primari 1, 2 enggau 3 nadai agi dipejalaika.
Atur ke deka dipejalai enggau perambu tu chukup manah laban nembiak Primari 1, 2 enggau 3 patut diseliahka ari semua bansa peresa, ku iya.
“Nyema KPM merambu deka ngetuka peresa nya, KGBS nyukung sereta nyambut manah perambu nya sereta enda ibuh nukar nya ngena peresa bukai.
“Enti diganti ngena peresa bukai, KGBS irau bendar deka bisi ‘ gaya’ beperesa baru jemah ila. Pengujung iya isu peresa tu enda ulih diputarka.
“Enggau chara tu (peresa nya diketu sereta enda ibuh diganti), KGBS ngarapka tu ulih meri awak ke mayuh agi ngagai pengajar ngemeran sereta ngemeratka silibus ti udah dilangkar dalam dokumen standard ungkup tetiap Tahap nya (Primari 1, 2 enggau 3),” ku iya lebuh nyaut tanya ari Utusan Borneo.
Ahmad ngarika KGBS mantaika penemu nya lebuh dipinta meri penerang bekaul enggau peresa ungkup nembiak Primari 1 ngagai 3 deka diketu berengkah taun baru.
“Nya alai, ke patut pengawa ngetuka peresa Tikas 1 ungkup sekula primari patut ukai nyadi isu laban peresa ba tikas nya ukai peresa perintah tang semina PBS ti enggau tuju dikena nemu penyulut nembiak ba tikas nya,” ku iya.
Berindik ari perambu nya, KGBS ku iya minta tauka ngansak KPM ngambika kurikulum Primari 1 ngagai 3 diubah lalu senipak enggau sistem kurikulum nadai peresa baka ti diperambuka opis menteri nya.
Tuju iya, dikena numbuhka kurikulum enggau silibus ti sebela enggau sistem ke nadai peresa, ku iya.
“KGBS amat ngarapka pengawa deka ngubah kurikulum ti bekaul nya,KPM deka ulih ngelangkar kurikulum ti mekuh ngagai ‘kemenjadian pembinaan’ enggau ‘pembentukan watak insaniah’ enggau ‘kenegaraan’ sesiku nembiak ba tikasa Primari 1, 2 enggau 3. KGBS ngarapka perambu tu ulih diperundingka.
“KGBS ngarap tauka minta bala pengajar sereta raban bansa nyukung pengawa KPM ke deka ngetuka peresa Primari 1, 2 enggau 3 ngena runding tauka ati tebuka senipak ubah transformasyen ke deka ngenegapka pelajar menua nuju penyulut,” ku iya.
Bepelasarka ripot sebengkah portal berita di Petaling Jaya mataika ripot ti madahka peresa ungkup nembiak Primari 1 ngagai 3 deka diketu berengkah taun baru.
Bepelasarka ripot berita nya, Menteri Pelajar Dr Maszlee Malik mantaika pekara nya nengah Twitter iya ensanus ti madahka peresa nya deka diganti enggau ‘pentaksiran lebih objektif’.
“Peresa ungkup nembiak Tahap 1 (Primari 1, 2 enggau 3) deka diketu lalu diganti ngena pentaksiran lebih objektif berengkah ari taun 2019,”
Taja pia iya (Maszlee) enda meri penerang silik bekaul enggau pemutus nya.
Ahmad Malie Presiden KGBS