Pekebun sawit diansak meseti ngembuan setipikit MSPO
MARUDI: Kaban Kunsil Nengeri ( ADUN) Telang Usan, Dennis Ngau minta semua raban ngaul diri ba pengawa nanam sawit kelebih agi peranak rumah panjai ti jauh ke menua pesisir ba nengeri tu diansak nitihka pinta atur ngembuan setipikit Malaysian Sustainable Palm Oil (MSPO) ti dipinta raban bekuasa bekaul ti deka diteritka ujung taun 2019.
“Pekebun mesti nerima realiti peminta nya lalu berengkah ngatur pengawa berengkah ari diatu sebedau iya kelalu laun. Nadai ngembuan setipikit baka ti dipinta ngujungka sida enda ulih nyual asil buah sawit ti diketau.
“Diau jauh ba menua pesisir ke alai sekeda peminta nadai dipinta sebedau tu ngagai kitai maya bejualka asil utai tanam ukai nyadika dalih, kelebih agi sida ti ngaul pengawa ladang sawit ti mansutka penatai pemisi.
“Tentu mega deka begunaka pengiruh tang aku nyamin, enti semua pekebun ngembuan setipikit ba semua atur pengawa kita betanam, deka ngemai asil enggau rega ti mandah agi ngagai asil sawit Malaysia laban deka mayuh agi ulih dijual ba makit dunya. Mayuh agi sida ti meli produk kitai deka tentu deka ngemai penguntung ngagai semua ti ngaul diri ba industri,” ku Dennis.
Dennis mansutka jaku tu lebuh bejadika ‘ Program Pengurusan Kelapa Sawit Pekebun Kecil mampan ke arah Persijilan Malaysian Sustainable Palam Oil’ ( MSPO) diatur MPOB, SOPB enggau DEEBAJ sereta JKKK Kampung Long Bemang apin lama ke udah.
Lebih ari 300 iku pekebun mit ngulu program ti datai ari Long Bemang enggau rumah panjai besemak.
“Aku datai kitu, bejadika pengawa ngelanchar program laban aku nemu tu beguna amat ngagai kita lalu aku ngansak semua kita beratika pekara tu,” ku Dennis nambah.
“Tu pekara nyata ba pengidup kitai kemaya hari, setipikit bisi pangku pengawa besai sebagi ari idup kita ti meri kelai sereta mega meri kita bisi pengelebih ngagai raban besemekih bukai, kelebih agi diatu penyampau tubuh peranak majak nambah.
“Ngenukuka pekara tu sekalika produk betanam betupi tauka produk industri, pengawa nyendiaka servis profesional deka meri pengelebih tauka pengelebih ngagai raban ti besemekih enggau kitai. Lalu penatai pemisi mega tentu deka manah agi,” ku iya.
Nya kebuah Perintah Malaysia udah bejalaika semua pengawa nentuka Industri Sawit bisi inisiatif minta setipikit ngambika sawit sida ulih dijual lalu bisi pengelebih dibida enggau menua ngeluarka sawit dunya, lalu semua orang mesti bejalaika pangku pengawa sida, pekebun besai tauka mit, ku Dennis.
Nangkan nya ku Dennis, peminta rega sawit ti dijual bala komuniti ari pangka rega makit dunya lalu pekara tu belalauka peminta gempung megai komoditi dunya. Nya kebuah Malaysia nadai pilih tang nitihka pengawa bekebun chara betul ngambika ulih besemekih nyengkaum ngembuan kaul ti manah enggau kuasa besai ekonomi baka menua China, India enggau Menua Eropah.
“Datai ba rega komoditi dunya, nadai siti perintah ulih tetagangka rega nitihka peneka pekebun. Nya alai perintah patut bejalaika pengawa dikena nentuka asil menua kitai ulih besemekih. Siti ari pekara pemadu beguna iya nya nentuka semua raban bisi pemerat nyengkaum pekebun mit ba rumah panjai menua pesisir nangkup peminta menua ti meli,” ku iya nerang silik.
Dennis mega madahka Kepala Menteri Sarawak, Datuk Patinggi Abang Johari Tun Openg enggau Perintah Nengeri ngetuaika pemutus ti digaga niang Tok Nan, ti enda ngemendarka ladang sawit ditanam ba tanah nengeri, kelimpah ari tanah Adat Bansa Asal (NCR), ke alai pemutus nya dilempai ngagai pengempu tanah ngambi berimbaka tanah tu.
Tang perintah nengeri meransang peranak menua tu ngemansangka tanah sida empu ari bantu disediaka raban ejensi bekaul nengeri. Dennis ngarapka mayuh agi seminar ti sama deka diatur ba Telang Usan nentuka semua raban kena pangka enda tinggal tauka enda sedarka peminta setipikit tu.
Antara bala speakers seminar iya nya , Sekretari Peribit Opis Menteri Industri Besai Paren Nyawi, Ketuai Sustainability of SOPB Galau Melayong, enggau TK. Usong Deng.