Bajet nya nadai nyebut pekara bekaul peranak Sarawak kelebih agi ungkup orang betanam betupi
KUCHING: Bajet 2019 ke nyadi bajet keterubah Perintah Pakatan Harapan (PH) ke dibantai Menteri Pekara Wang Lim Guan Geng kemari enda ngelantang ati kelebih agi ungkup peranak Sarawak.
Sapit Kepala Menteri Datuk Amar Douglas Uggah Embas madah iya deka macha dulu enggau silik sentang bajet nya ketegal nadai nyebut pekara ke bekaul enggau peranak Sarawak, kelebih agi ungkup orang betanam betupi.
“Nadai pekara ke bekaul enggau pengawa nyukat tanah,, kitai mega enda nemu nama kebuah sida mega nadai nyebut sebarang pekara ke bekaul enggau subsidi getah, lada.
“Aku enda nemu sentang bajet, enda berapa terang,’ku Menteri Betanam Betupi Moden, Tanah Adat enggau Pemansang Kandang Menua.
Uggah madah kededua bajet 2018 enggau bajet 2019 meseti diterangka enggau silik.
Uggah enda lantang enggau agih belanja ungkup Sarawak tajapan Guan Eng madah penyampau ke diberi ngagai Sarawak ditiki ngagai RM4,346 juta ba 2019 enti dibandingka RM4,336 juta ba 2018.
“Kami enda lantang, nadai penerang ke silik sentang program sukung, subsidi ungkup getah, lada, sawit enggau ke bukai. Engka enda dipeda kitai,’ku iya.
Entara ke ngasuh enda lantang iya nya nadai program tanah Hak Adat Bumiputera (NCR), tajapan perintah ke dulu ngagihka belanja ke besai ba pengawa nyukat kelingi enggau program pemansang tanah ungkup orang bumai dikandang menua pesisir Sarawak.