Lim: Projek Jalai Besai Pan deka majak digaga

KUALA LUMPUR: Perintah deka majak ngaga projek Jalai Besai Pan Borneo Sabah enggau Sarawak bepelasarka pansik rasionalisasi ungkus,pia ku Menteri Wang Lim Guan Eng.

Kelimpah ari nya, Lim lebuh bejuraika Bajet 2019 di Dewan Rakyat sehari tu,madahka perintah mega ngungkupka RM5.009 bilion ngagai Sabah lalu RM4.346 bilion ngagai Sarawak taun baru dikena nentuka kededua negeri nya terus dikemansang.

Tu dibandingka enggau RM4.133 bilion ungkup Sabah sereta RM4.336 bilion ngagai Sarawak ti diungkupka dalam bajet 2018.

“Projek di Sabah enggau Sarawak nyengkaum ngaga sereta ngangkatmanah infrastruktur ai, elekterik eng- gau jalai alun,perengkaguna pengerai enggau pelajar sereta pemansang koridor ekonomi,”ku iya.

Iya mega madahka perintah bisi nyendiaka RM100 juta dikena ngangkatmanah jalai, projek sistem bekal ai, ngaga sereta ngangkatmanah begunan enggau projek ngelekatka lampu jalai ba palan pengentap Felda, iya nya penambah 51 peratus dibanding enggau ungkup belanja ke sebedau tu.

“Perintah mega deka ngungkupka RM100 juta dikena nyukung komuniti India nyengkaum latih teknikal enggau pengelandik dikena ngangkatka peluang gawa ungkup nembiak bansa India lalu RM100 juta agi dikena negapka pemansang raban bansa Orang Asli,” ku iya.

Ba pekara neruska komitmen perintah nambah manah sereta ngangkatka perengkaguna kelebih di menua pesisir, perintah merambu ngungkupka RM926 juta diberi dikena ngaga sereta ngemanah jalai alun, jalai menua pesisir enggau jematan, ku iya.

Sepenyampau RM694 juta enggau RM738 juta deka diberi dikena ngerembaika akses bekal elekterik enggau ai di menua pesisir, ku Lim.

Kelimpah ari nya, perintah mega bisi nyendiaka RM85 juta ngagai genturung pendiau baru dikena ngangkatmanah sereta ngintu infrastruktur baka jalai alun, balai komuniti enggau endur tanah ke puang.

Ku Lim, perintah mega merambu ngungkupka RM20 juta ngagai serakup peranak menua ti berejista ba Opis Rejista Gerempung Malaysia ke tuju bejalaika aktiviti komuniti,pengelikun, pengawa meresi enggau ‘program kejiranan’. — Bernama