Fatimah enda lantang ati agi bisi kes muai anak mit

KUCHING: Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Dato Sri Fatimah Abdullah enda lantang ati enggau kes muai anak mit baru ada ke nyadi di Kota Samarahan, Hari Empat tu tadi.

Nitih ku Fatimah, mayuh kimpin enggau avokasyen dikena ngurangka kes nembiak betubuh bisi sereta anak mit ada sebedau nikah udah diatur, tang chukup sinu agi bisi kes muai anak mit baru ada nyadi.

“Kitai udah ngatur mayuh macham pengawa baka ngatur kimpin enggau avokasyen dikena nerangka pasal servis enggau sistem sukung ti bisi disediaka nyema udah tekelanjur sereta ngandung sebedau nikah.

“Tang, aku chukup sinu lebuh kes muai anak mit baru ada nyadi taja pan bisi servis disediaka baka ‘baby hatch’ sereta palan nyaga orang indu ti ngandung nya sereta anak mit ti diada ari Institut Kebajikan enggau Gerempung Ukai Dikuasa Perintah( NGO),” ku iya lebuh dikerandau kemari.

Mensia mayuh ensanus dikenyitka enggau berita berindik ari bisi tetemuka bangkai siku anak mit indu ba kandang endur muai sampah semak enggau flat ba Desa Ilmu, Kota Samarahan ditu.

Anak mit nya chukup perengka tubuh sereta agi bisi tali pusat ditemu mensia mayuh dalam tong sampah lebuh ke benung ngiga tin aluminium ba endur muai sampah nya.

Ketua Siasatan Jenayah ( JSJ) Sarawak SAC Denis Leong ngesahka pekara nya sereta madahka bangkai anak mit nya dianjung ke Opis Perubat Forensik Umum Sarawak ngambika dibuntas tasat.

Kes ditasat dibaruh Seksyen 318 Kanun Keseksaan lalu mensia mayuh ke bisi penerang bekaul enggau pekara nya dipinta madah enggau lengkas ba sebarang balai polis ke semak ngambika ulih mantu pengawa nasat.