Perintah Nengeri Sarawak enda besemaya puang tang udah ngelangkar mayuh projek pemansang kelebih agi di menua pesisir

MUKAH: Perintah nengeri Sarawak nyata enda semina besemaya puang nyema pekara nya bekaul enggau pemansang di nengeri tu.

Kaban Kunsil Nengeri (ADUN) Daro Safiee Ahmad madah, pekara tu nyata nengah mayuh projek perengkaguna sereta prasarana chakah dipejalai kelebih agi bekaul projek ngaga jalai alun di kandang menua pesisir.

“Kitai ulih meda iya nya urung 600 iku peranak di Sungai Lengan deka bisi akses jalai alun enda lama agi,” ku iya madah lebuh ngabas palan ngaga jalai alun di Sungai Lengan bedau lama ti udah.

Entara rumah panjai ti bisi bulih pemaik ari penembu projek pemansang tu iya nya Rumah Seli, Rumah Igat, Rumah Bungkok, Rumah Jimmy enggau Rumah Jingga ti ngaul urung lebih ari 1000 pintu.

Projek ti beungkus RM480,000 ari baruh Program Transformasyen Menua Pesisir (RTP) iya nya nyengkaum projek ngaga jalai alun pemanjai dua kilometer lalu diatu benung ba renggat keterubah.

Ba renggat ti nangkan ke tu ila, sebuah jematan deka digaga dikena ngemuntangka peranak di kandang menua nya bulih akses ke jalai besai Sibu-Tanjung Manis.

Taja pia, Safiee madah deka bisi napi pengelaun mimit sentang projek ngaga renggat keterubah tu ti patut tembu bulan Oktober tu tadi.

“Laban kitai agi nganti proses nyerenih ti kepenudi pengawa ngaga projek tu ari Opis Kereja Raya (JKR) Sibu,” ku iya.

Kelimpah ari jalai alun, entara projek bukai di Sungai Lengan iya nya ngaga Balai Komuniti, gelanggang futsal Sekula Primari (SK) Lengan, jematan sereta sekeda projek ke bukai.

Beserimbai enggau nya, iya ngarapka kerejasama ari ketuai sereta ketuai komuniti di kandang menua nya ngambi ulih nentuka langkar projek nya bejalai enggau manah.

Kitai ulih meda iya nya urung 600 iku peranak di Sungai Lengan deka bisi akses jalai alun enda lama agi. Safiee Ahmad ADUN Daro