Jematan Ulu Entaih deka nyungkak pemansang infrastruktur di Meluan
JULAU: Kaban Kunsil Nengeri (ADUN) Meluan Rolland Duat udah ngabas projek ngaga jematan ti nyadi entara faktor ke ulih ngelengkaska timpuh pejalai peranak di kandang menua nya kelimpah ngemuntangka pengawa mai fasiliti pemun ngagai kandang menua pesisir.
Ba kandang menua di Meluan ti tinggal sentang pemisi infrastruktur pemun, fasiliti sereta perengkaguna pemun, lalu ku iya, endang engkeman nyema mekuh ngagai projek pemansang ngaga jalai alun enggau jematan. Iya bejaku munyi tu lebuh ti bejadi jematan di Ulu Entaih ditu, kena Har Tiga tu tadi.
“Nengah pemisi jematan ba kandang menua tu, peranak ditu enda ibuh agi nganti ai surut enti deka meraka sungai,” ku iya seraya nambah taja jalai agi bedau dibelakin, tang ulih ditengah peranak di kandang menua nya.
Ku iya nambah, jematan nya deka nyungkak pemansang bukai kelebih agi dikena mindahka injin ti besai ke dikena ngangkatmanah jalai. Berindik ari pemisi jalai enggau jematan deka nentuka pekara bukai mega muntang digaga baka pengawa nganjung tauka nyediaka bekal ai, kuasa karan sereta ngenyakahka servis komunikasyen.
Ku Rolland, jematan Ulu Entaih ti beungkus RM400,000 nya nyadi siti projek ari baruh Program Transformasyen Menua Pesisir (RTP) iya.
Siti agi projek ngaga jematan ti beungkus RM350,000 agi benung dipejalai enda jauh ari Rumah Musit. Pia mega agi bisi sekeda projek ngaga jematan di kandang endur bukai lalu deka bisi myuh agi nyengkaum di Nanga Lasit dilangkar deka digaga ari baruh agih belanja RTP iya ungkup taun 2020.
Kelimpah ari nya, iya mega madah sekeda projek pengawa nyambung paip ungkup peranak Meluan ti deka nyediaka bekal ai beungkus RM79 milion deka meri pemaik ngagai 58 buah rumah panjai semanjai Jalai KJD.
Iya mega besemaya ngagai mensia mayuh deka terus bebendar nentuka bisi geran pemansang dikena ngubah Julau nyadi siti ari komponen dalam pelin Sadok Agropolitan ti mungkur Betong enggau Saratok.
Beserimbai enggau nya, dikena nentuka projek pemansang terus dipejalai, iya ngansak ketuai komuniti di kandang menua nya bekerejasama enggau komuniti.
Ba kenang ke bukai, maya Pengerami Ketuai Begulai Enggau Rayat ti digaga ba Rumah Menyimbang, Rolland udah madah deka meri geran RM10,000 ungkup Komiti Pemansang enggau Pengelikun Genturung Pendiau (JKKKK) sereta Gerempung Indu rumah nya.
Entara ke bisi datai pengari ari Opis Pelilih Pakan SAO Yalin Asan, pengari ari Opis Residen Sarikei SAO Henry Gimong sereta bala tuai rumah.