Bup “Sarawak Women & Wellness” ti dichelak kena meri puji enggau terima kasih ngagai orang indu ti nyulut gawa dalam bidang pengerai

KUCHING: Bup “Sarawak Women & Wellness” ti dichelak dikena meri puji sereta terima kasih ngagai orang indu enggau Gerempung Ukai Dikuasa Perintah (NGO) dalam bidang pengerai, tau nyadi teladan rebak baru dalam pengawa voluntari.

Menteri Pengintu Pengelatang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah Abdullah madah,bup nya nyerita pejalai sereta peneleba 18 iku personaliti ti nyulut dalam servis sereta NGO ke dipejalai sida dalam bidang pengerai.

Bup nya dichelak nyerumba ngintu pengemai Hari Orang Indu Renggat Nengeri Sarawak 2018 ti berambaika jaku ‘ Orang Indu enggau Pengerai’ ke diintu sehari tu (3 November) ba Penview Convention Centre (PCC), Demak.

“Kitai ngarapka nengah cherita dalam bup tu tau nyadi insiprasyen ngagai rebak baru diatu nyereta voluntari.

“Kitai meri puji sereta terima kasih 18 personaliti bup ke dikangau sehari tu, laban ke udah meri servis nengah NGO dulu suba tauka diatu.

“Kebendar ukai semina sida 18 iku tu aja tang kitai pechaya agi mayuh orang indu diluar din ke nyulut meri servis nengah gerempung sida,tu semina bup ‘Coffee Table Book’ukai bup pansik,” ku iya.

Fatimah mansutka pekara nya lebuh bejaku ba pengerami ‘Hi-Tea’ Begulai enggau Personaliti Bup ‘ Sarawak Women and Wellness’ ke diatur Opis Orang Indu enggau Ruang Bilik Sarawak (JWKS) ba sebuah hotel ditu, lemai kemari.

Batang tuju pengerami HiTea nya kemari dikena meri terima kasih sereta ngaku 18 personaliti bup ti dipilih laban ti udah meri servis nyulut enggau bantu sida dalam bidang pengerai nyengkaum nengah gerempung.

Bup ti nyerita 18 personaliti nya deka dipenyadika ulih Kepala Menteri Datuk Patinggi Abang JohariTun Openg nyerumba bejadika Hari Orang Indu Renggat Nengeri Sarawak 2018.

Entara 18 personaliti bup nya baka Angelina “Angie” Jong; Dr Yuwana Podin; Datin Louise Luncha Kanyan; Nurina Kusairi; Rosena Abdul Ghani; Monica Bonel Pantulusang; Jocelyn Hee; Datin Suriani Rapaiee; Dr Bibiana Teo; Rahmah Wahap-Nicholls; Dr Ong Puay Hoon; Dr Beena Devi CR; Dr Rosliwati Md Yusoff; Sa-reah Wahet; Lee Na; Dr Uma Devi enggau Dr Tan Poh Tin.

Fatimah madahka Hari Orang Indu taun tu mega meri ngenang sereta meri terima kasih ngagai bidan ti gawa tauka meri servis kenyau ari taun 1950an.

Bisi 13 iku bidan ti keterubah endar di Sarawak ke temu digiga dalam timpuh pandak, diberi basa nyerumba Hari Orang Indu taun tu iya nya Hajijah Ibrahim; Baun Balan;Asong Lenjau; Aben Aneh; Emily Lee Shui Eng; Catherine Nanang; Catherine Likup; Muda Raja; Gong King Lui; Ngieng Suk Ding; Dayang Aminah Abang Jas; Monica Lime Bakar enggau niang Christina Sap (diarika anak iya Theresa Jita).

“Kitai ngingat sereta meri basa ngagai pengawa ti udah digaga bala bidan maya nya kelia betapi enggau penyeranta kelebih agi di menua pesisir,nadai infrastruktur ti ngujungka bidan tu ngambi timpuh ti panjai lebuh deka ngelawa rumah panjai ke endur orang indu ke bisi deka beranak.

“Nitihka cherita sereta peneleba ke dipekunsi bala bidan ke gawa taun 1950an, sida dibayar RM10 ke tiap kali mantu ngadaka anak lalu RM2 enti ngerejista pengada nya.

“Tang bayar nya patut diambi ba opis pelilih menua, ketegal kelalu jauh dia bala bidan suba, mayuh meri servis nyaup ngadaka anak mit enggau nadai bebayar,” ku iya seraya ngelalau rebak baru, nya mih pengawa manah ke udah di kereja bidan dulu kelia.

Sama bisi datai ba pengerami nya sehari tu, Menteri Muda Orang Indu, Ruang Bilik enggau Pemansang Nembiak Mit Rosey Yunus; Menteri Muda Pengelantang Pendiau Raban Bansa Datuk Francis Harden Hollis; Direktor JWKS Noriah Ahmad enggau ke bukai.

Kitai ngarapka nengah cherita dalam bup tu tau nyadi insiprasyen ngagai rebak baru diatu nyereta voluntari. Dato Sri Fatimah Abdullah Menteri Pengintu Pengelatang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit