Perambu pemansang ungkup kandang menua sereta anjung ngagai perintah
KUCHING: Komiti Ngemansang Kandang Menua ngembuan tanggungpengawa ke besai ti deka dipejalaika ba pelin ti deka datai dikena ngemansangka kandang menua sida.
Sapit Kepala Menteri Datuk Amar Douglas Uggah Embas madah, sida tau nganjung langgur nya ngagai perintah ngambi tau diperundingka.
“Komiti nya ba penuduk ke pemadu manah madah ngagai perintah sentang utai ti di kedeka rayat nyengkaum pekara ti deka digaga sida,” ku iya kemari.
Berebak enggau nya,Uggah lebuh ke di Miri udah nerima penemuai basa raban Komiti Ngemansang Kandang Menua San ti betuaika chairman komiti nya, Penghulu Anthony Kule Lalo.
Kandang Menua San di Telang Usan diuan urung 220 buah ruang bilik ari 10 buah rumah panjai bansa Kenyah enggau sebuah rumah panjai bansa Penan.
Ku Uggah, kandang menua nya mega ari baruh bungkur Agensi Ngemansang Tanah Tingg (HDA) ti baru ditumbuhka.
Ku iya nengah pengawa numbuhka HDA, rayat din deka ngasaika mayuh macham pemansang dalam timpuh dua taun ari berengkah ari taun baru kelebih agi ba pemansang infrastruktur, ekonomi,pelajar enggau pengawa rama.
Kandang menua nya mega bisi potensial besai dike- mansangka ba pengawa betanam betupi baka nupi engkelulut ti deka ngasilka madu engkelulut, nanam kopi,nupi ikan ngena sistem Tagang enggau dagang temuai.
Uggah ke mega Menteri Betanam Betupi Moden, Tanah Adat enggau Pemansang Kandang Menua, madahka peintah diatu meransang rayat ngereja pengawa betanam betupi moden nengah chara komersial laban nya manah agi tusun pengawa, pemansut enggau penguntung.
“Sektor peribit dipelabaka deka nyadi raban ke beguna amat ba pekara nya.
“Lebuh sida beranakka puku, sida mega deka beranakka puku ba pemansang infrastruktur ti deka meri pemaik sereta muka peluang kereja ngagai rayat,” ku iya.
Berebak enggau nya, Uggah madahka Kaunsil Ngempung enggau Ngintu Tanah Sarawak (Salcra) deka dipinta ngelala tanah ti manah endur numbuhka pengawa betanam betupi lalu ngaga pemutus entara tanah NCR enggau tanah nengeri.
Uggah mega bisi ngungkupka geran RM20,000 ngagai komiti nya.
Lebuh ke bejaku dulu ari nya, Penghulu Anthony madahka rayat din arap endar ngambika San diangkat nyadi pelilih mit.
Iya mega ngasapka Uggah ulih meri lalau ngagai rayat din sentang kus ke patut disereta ngambika sida ulih progresif agi mandang ke mua.