Entara nya RM11 bilion ungkup infrastrktur lalu tu penyampau bajet ti paling besai dalam sejarah DUN ti deka datai
MUKAH: Perintah nengeri Sarawak deka bejuraika bajet ti paling besai dalam sejarah Kunsil Nengeri (DUN) ti deka datai.
Kepala Menteri Sarawak Datuk Patinggi Abang Johari Tun Abang Openg madah, entara nya agih belanja RM11 bilion dikena mutarka infrastruktur pemun di nengeri tu.
“Ungkup penyambung jalai alun RM6 bilion, lalu ungkup bekal ai sereta elekterik RM5 bilion,” ku iya madah maya Bejadi Simposium Budaya Melanau Ke-7 2018 malam kilah ensana.
Ku iya, nya endang siti ari pemerat perintah nengeri diatu laban ketetiga perengkaguna nya pun ngagai pemansang nengeri.
Ku iya, perintah nengeri ngena polisi nitihka peminta rayat lalu nya dijadika guna ti patut dikemerat.
“Kitai ninga nama peminta rayat lalu nya utai kedeka rayat, kitai lalu ngadu,” ku iya nerang.
Iya ngaku nya ukai ngena ungkus ke mit, tang iya bisi chara kediri empu dikena nentuka nya bejalai enggau lanchar sereta diduluka.
Bekaul simposium, nya siti garis lalau ngagai perintah ngambika ngaga polisi sereta prinsipal.
Simposium semua raban bansa di Sarawak ku iya endang diperansang lalu iya deka nentuka nya tetap diteruska ba baruh pegai iya.
Mayuh agenda ulih dikerandau sereta dipejurai kelebih agi pekara bekaul komuniti nya empu.
Nengah tu, pemansang komuniti mega deka meri empas ngagai pemansang nengeri Sarawak.
Simposium entara raban bansa di nengeri tu ku iya udah bisi kenyau ari taun 1988 maya jeman dipegai Yang Dipertua Negeri Sarawak Tun Pehin Sri Abdul Taib Mahmud (lebuh nya Kepala Menteri Sarawak) lalu diteruska nyentuk diatu.
Sama bisi ba pengerami nya bini Kepala Menteri Datin Patinggi Juma’ani Bujang, Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Dato Sri Fatimah Abdullah, Kaban Kunsil Nengeri ( ADUN) Balingian Abdul Yakub Arbi, ADUN Tellian Yussibnosh Balo, Presiden Persekutuan Persatuan Melanau Sarawak (PPMS) Tan Sri Muhammad Leo Toyad, Menteri Muda ba Opis Kepala Menteri (Pekara Korporat) Abdullah Saidol sereta temuai dipebasa ke bukai.
Ungkup penyambung jalai alun RM6 bilion, lalu ungkup bekal ai sereta elekterik RM5 bilion. Datuk Patinggi Abang Johari Tun Abang Openg Kepala Menteri Sarawak