Penyulut nembiak dalam akademik, kokurikulum patut diberi sukung
SEKUAU: Gempung Komiti Pemansang enggau Pengelikun Genturung Pendiau (MJKKK) Sekuau, Oya enggau Pakoh udah ngatur Woksyop Jari Kreatif kemari.
Woksyop nya belajarka chara ngaga kain selampai sereta kain burie di Balai Komuniti Skim Genturung Pendiau Baru Sekuau.
Bisi 60 iku peranak di kandang menua nya udah nyereta woksyop nya ti diajar dua iku pengajar iya nya Dami Dingun enggau Sebai Albert.
Dami madah, pengawa ngatur woksyop nya nyadi siti ari program ke udah dilangkar MJKKK Sekuau, Oya enggau Pakoh semanjai taun tu.
“Nengah woksyop tu ulih nambahka agi penemu sereta pengelandik semua pesereta ba pengawa ngaga kain burie sereta kain selampai.
“Pia mega, kitai ngarapka pengelandik tu enda lenyau,” ku iya nerang.
Dami mega ngena awak tu meri besai terima kasih ngagai Kaban Kunsil Nengeri (ADUN) Tamin Christopher Gira, Menteri Muda Nembiak, Lumba enggau Main ke mega ADUN Balai Ringin Snowdan Lawan sereta Kaban Parlimen Hulu Rajang Datuk Wilson Ugak Kumbong ba sukung ti udah diberi sida.
“Terima kasih ngagai pengari rayat ke udah meri bantu ari sukut agih belanja dalam ngatur mayuh aktiviti kami semanjai taun tu,” ku iya.
Kain burie iya nya siti ari kereban ngepan asal bansa Iban ke diatu makin nerima sambut berindik ari ubah dalam dunya fesyen.
Kain burie tu digaga ngena kulit tauka kerubung siput ti dikena ngiyas kain nitihka gaya ti dikedeka kitai. SIBU: Pengawa ngenukuka penyulut nembiak sekula dalam bidang akademik enggau kokurikulum endang patut ungkup semua nembiak kelebih agi sida ti udah ngayanka penyulut ba taun sebedau nya.
Pengerami ‘Anugerah Pelajar Cemerlang’ Sekula Sekondari (SMK) Sibu Jaya siti ari pengerami ninting taun sekula ti digaga dikena meri basa ngagai penyulut nembiak sekula dalam semua bidang kelebih agi akademik enggau kokurikulum.
Temuai dipebasa pengerami nya, Kunsilor Kong Yii Tee madah pengawa ngatur pengerami bansa nya seriris enggau batang tuju pelajar iya nya deka ngadaka mensia ti sebela ari sukut fizikal, jalai pengarap, runding, penemu enggau rama ninting taun.
Ku iya, bala nembiak sekula deka diserenih dalam mayuh sukut sekalika ba tikas pemutus peresa, nyadi ketuai, disiplin, lumba enggau main sereta pengawa sida dalam ngangkatka nama sekula di mata komuniti ba kandang menua nya tauka di luar.
Ku iya, pengawa ngenukuka nya digaga enggau pemisi apai indai nembiak nya datai kediri ukai semina enggau bekunsika pengandal ati sida, tang mega kebendar nya dikena ngenukuka apai indai sida ti udah meri sukung ti kuat ba pemujur sida.
“Kelimpah ari pengawa ngenuku pengerami nya mega diatur dikena nyadika peransang enggau pengeransing sereta medium dikena ngadaka nembiak ti nyulut enggau bisi kualiti dalam akademik, kokurikulum, jalai pengarap tauka ulah.
“Nya (pengerami) mega ngembuan tuju nerenakka runding besemekih entara bala nembiak ti nemban ngambika sida ulih nyikap diri enggau mayuh macham penemu sereta dipeda nyulut,” ku iya lebuh bejaku ba pengerami nya.
Kong ba pengerami nya mega sama ngarapka sekula terus begulai sereta sepenemu enggau apai indai pia mega ketuai dalam komuniti.
Ba pengerami nya Adrian Teni@Tonny udah nerima gelar ‘Pelajar Mithali’ kategori lelaki kelimpah bisi mega bulih anugerah Nembiak Nyulut Kokurikulum lalu Follymena Miluh Johnson bulih gelar ‘Pelajar Mithali’ kategori indu sereta bulih ‘ Anugerah Pengetua’ ba penyulut iya dalam pengawa nyadi ketuai.
Kong mega bisi meri bantu sepenyampau RM2,000 ngagai wang turu Gerempung Apai Indai enggau Pengajar (PIBG) SMK Sibu Jaya.
Sama bisi datai iya nya Chairman PIBG SMK Sibu Jaya Danggang Ugik enggau prinsipal SMK Sibu Jaya Yusri Azhar@Leo Takip.