Raban nembiak patut nyikap diri enggau pengelandik industri berat
BINTULU: Bala nembiak patut nyikap diri ngena penemu enggau pengelandik ba bemacham bidang ngambi ulih nangkup makit kereja pengudah tembu besekula kelebih agi ba bidang pengelandik industri berat ti majak ngerembai ba mengeri tu.
Kaban Kunsil Nengeri (ADUN) Samalaju Majang Renggi madahka sitak Samalaju enggau Kidurong nyadi sitak pemansang industri besai ba menua tu ti bisi bemacham industri berat nyengkaum minyak enggau gis ti begunaka orang gawa landik, jelan pengelandik enggau ke bukai.
Nya kebuah ku iya, bala nembiak patut meda ke mua enggau pengandal sereta semengat tinggi, ransing nyapai pelajar pemadu manah ngambika sida tetangkupka makit orang gawa ti diguna sitak nya dudi hari.
“Pekara dikemerat iya nya ngenegapka disiplin diri ngagai bala nembiak ngambika nyamai pemujur ti deka mantu nentuka kuing sida dudi hari,” ku iya ba pengawa bejadika Karnival Ceriathon diatur Serakup Apai Indai enggau Pengajar ( PIBG) enggau Sekula Primari (SK) Kidurong 2 ba sekula nya kemari.
Nyaup pengawa nya ku iya, apai indai diperansang bejalaika pangku pengawa matau pejalai bala anak sida ngambika enda tempawah ngereja penanggul rama.
Ku iya, kerejasama semua raban patut seruran dikemeran nentuka disiplin bala anak dijaga laban tu nyadi kunchi pemujur bala anak ba pelajar.
“Aku pechaya nengah polisi pelajar enggau standard kurikulum manah ti dilangkar, bala nembiak deka teulihka penemu ti meruan ba bemacham bidang. Munyi ku sempama, ‘melentur buluh, biarlah dari rebungnya’ tauka dikena nentuka pemujur bala anak, kitai nyura sida ari umur biak,” ku iya nambah.
Ngelansa pasal pengawa ngatur karnival nya, ku iya, relevan agi sereta enda ngachau atur belajar bala nembiak nengah pengeran gawa enggau kerejasama apai indai, bala pengajar enggau komuniti diau ngelingi ngiring bala anak nya.
“Aktiviti baka tu ulih nerenak semengat enggau ulah bedagang ngagai bala nembiak sereta nerenakka ulah kerejasama, beserakup, semengat diau bebaik raban sekula enggau apai indai sereta komuniti menua nya,” ku iya seraya ngemendarka agih belanja penyampau RM15,000 ungkup Wang Turu PIBG sekula nya sereta ngarap ulih ngatur aum enggau raban sekula enggau PIBG pasal chara mantu ngaga balai tebuka sekula nya.
Ba lansa bukai Chairman PIBG SK Kidurong 2 Nor Rigis madah, karnival ti dia- tur nya ngiga belanja dikena mantu Wang Turu PIBG SK Kidurong 2 ngatur bemacham aktiviti kokurikulum ungkup bala nembiak serata mantu nyeleti infrastruktur sekula ti rusak.
Iya ngarapka raban sida deka nerima bantu ari mata duit dikena nampung pelanja aktiviti sekula sereta ngaga balai mayuh guna sekula nya.
Karnival Ceriathon ti dipungkal ngena ‘Fun Run’ disereta 340 iku nembiak enggau penjauh pelanja 1km ngagai 3km, pelanda terbuka 5km ngagai 10km enggau beberapa aktiviti ti bela diatur iya nya senamrobik, bangsal bejualka pemakai enggau ai irup, bejualka gari udah dikena enggau kraf jari, suara emas, pekit ngelinsu, pengawa mandang ari raban perintah enggau peribit sereta bala bukai.
Bela diatu pengawa nyuaka pupu ari kelas enggau orang ngatika diri pemadu mayuh kad ceriathon, perais pekit ngelinsu enggau midul ngagai penyereta pelanda.
Sama datai Kepala Pengajar SK Kidurong Afendi Soon, Ketuai Unit Pengatur Pengawa Organisasyen Opis Pelajar Pelilih Bintulu Hamidah Mahmud, apai indai, bala pengajar kanan enggau pengajar SK Kidurong 2.