Penerang dipansut menteri pelajar Sarawak enda betul, ku Chong
KUCHING: Chairman Pakatan Harapan (PH) Sarawak Chong Chieng Jen bebula jaku Menteri Pelajar, Sains enggau Pansik Teknologi Dato Sri Michael Manyin ti nuduh Sarawak semina diberi 1.4 peratus ari penyampau agih belanja dalam Bajet 2019.
Ku iya, maya Menteri Pekara Wang Lim Guan Eng mantaika bajet nya kena Hari Lima tu tadi, iya madah RM4 bilion nya ari penyampau bajet pemansang RM54 bilion.
“Aku nemu bisi penerang ke dikerembai ba aplikasyen Whatsapp ti madah Bajet 2019 ngagihka Sarawak nerima RM4 bilion, Semenanjung RM270 bilion enggau Sabah RM5 bilion.
“Ba aku tu penerang bebula ke dikerembai raban cyber troper Barisan Nasional (BN). Penerang tu ngembuan niat ke enda manah.
“Aku alit ati, siku veteran politik baka Manyin enda meretika bajet lalu iya mantaika penemu ngagai media bepelasarka penerang bebula ke dikerembai cyber trooper BN,”ku Chong.
Iya mansutka jaku nya ba aum pengarang berita pengudah ngulu Aum ‘ Biasa’ DAP Sarawak Ke 18 di Crown Square ditu, kemari.
Manyin lebuh dirandau pemberita Hari Enam tu tadi madah Sarawak mayar 15 peratus chukai lalu semina dipulaika 1.4 peratus.
Chong ke mega Sapit Menteri Dagang Dalam Menua, Koperasi enggau Pekara Penguna (KPDNKK) madah bajet nya netapka RM250 bilion ungkup belanja ‘operating’.
Ku iya, belanja ‘operating’ nya dikena mayar gaji pengereja pengawa perintah baka ke raban pengajar, lutur, soldadu, polis enggau ke bukai.
Bisi 10 tauka 11 peratus pengeraja pengawa perintah di Sarawak, ku Chong ke mega Chairman DAP Sarawak.
Ngenang kaul ke sama, Chong madah ba taun 2017 Sarawak mayar chukai penyampau RM7 bilion ari semua RM150 bilion ke dikumpul.
“Tu mih saut ke diterima aku ari perintah ke dulu di parlimen ke diberi bala pemesai perintah ba jeman Najib,” ku Chong.