KM dipinta mantaika nama sapit menteri ari PH ti minta iya nginsil Undang-undang Imigresen

KUCHING: Chairman Pakatan Harapan ( PH) Sarawak Chong Chieng Jen minta Kepala Menteri (KM) Datuk Patinggi Abang Johari Tun Openg mantaika nama sapit menteri ari PH ti minta iya nginsil Undang- Undang Imigresen (Sarawak).

Bejaku ba aum pengarang berita ditu kemari, iya madah sapit menteri ke dituduh Abang Johari nya sigi ukai iya (Chong).

“Tuduh nya baka ke deka ngamahka nama aku, Taja nya sigi ukai aku laban aku udah dua bulan enda betemu enggau Abang Johari,” ku Chong.

Dulu agi ari nya iya ngulu Aum ‘Biasa’ DAP Sarawak Ke 18 ke dipenyadi kaban kunsil besai DAP ke mega Menteri Pengangkut Anthony Loke di Crown Square ditu, kemari.

Berindikenggaunya, Chong ke mega Sapit Menteri Dagang Dalam Menua,Koperasi enggau Pekara Bebeli Barang( KPDNKK) minta Abang Johari anang nyelalai bagi sapit menteri nya.

“Padahka enggau terang lalu anang mansutka penerang tauka tuduh ke memekang.

“Pekara tu baka ke deka ngelabuh reputasyen aku,”ku Chong kemega Chairman DAP Sarawak.

Abang Johari kena Hari Enam tu tadi madah bisi seiku ketuai bepangkat sapit menteri Perintah PH datai nemuai meri basa ngagai iya lalu minta Sarawak nginsil Undang-Undang Imigresen (Sarawak).

Penerang nya dipansutka Abang Johari ba aum pengarang berita pengudah aum kunsil tinggi Parti Pesaka Bumiputera Bersatu (PBB).

Tajapia, iya madah enda sengapa deka nginsil undang undang nya lalu deka seruran dinan ungkup pengelikun Sarawak enggau peranak Sarawak.

ANANG NUDUH MEMEKANG: Chong (duduk tengah) disempulang bala ketuai DAP bejaku ba aum pengarang berita di Kuching.

NAMA BERITA?: Snowdan betabi enggau Rt Reverand Datuk Bolly Lapok (kanan) rambau pengerami ngempuru belanja Gerija All Saint Parish Tabuan di Kuching.