Sekeda nembiak tadika ti kurang diperati nerima bantu Hope Place
KUCHING: Sekeda nembiak ari tadika ba genturung pendiau urung empat jam pejalai deriba ari indu mengeri tu nyadi raban pemadu baru dipasuk ba lis projek bantu pemakai pengelama setaun Hope Place.
Ba penerang berita ari Pemungkal Hope Place, Kelvin Wan, bala nembiak ti kurang benasit dipadahka pengajar ti minta bantu ungkup sida nya.
“Raban nya deka pulai baru pengudah setaun ngambi berati ruang bilik tu sekali agi ba sebarang ubah tauka bisi maju ba pendiau sida,” ku Wan.
Nitih ku Wan, pengajar ti nemu sekeda nembiak nya enda regas dalam kelas ngujungka sida ngaga pemutus bejalai ngabas rumah nembiak nya lalu tetemuka sida tu kurang diperati.
“Pengajar nya berasai sinu enggau siruka bala nembiak iya lalu udah besemaya deka volunteer nganjung sebarang bantu ninting bulan enti Hope Place nangkup peminta sida,” ku iya.
Pengajar nya mega nyemetak madahka bala nembiak endang teleba nurun sekula nadai ngirup pagi lalu bisi sekeda enda meruan tinduk maya malam hari.
Rambau pejalai ngabas genturung pendiau nya, tim Hope Place tetemuka nyauka semua nembiak mit dia diteju ngambika diibun aki ini sida laban apai indai bekereja ba kandang mengeri.
“Tebal agi apai indai ngagai mengeri besai ngiga kereja lalu jarang tauka nadai kala pulai ngabas sida sebilik ba menua. Sida ke tuai, ti nadai penatai pemisi, ngintu diri empu enggau bala uchu sida,” ku Wan.
Penanggul bukai ti ditemu tim nya ku iya, bisi beberapa janda nadai anak diau ngatika diri ba genturung pendiau nya.
Ba lansa bukai, Hope Place nganjung bantu tiga bulan sekali laban mayuh ruang bilik ba lis penerima sida.
Diatu Hope Plave mantu lebih ari 180 ruang bilik. Penerang silik, mensia mayuh tau betanya ngagai Hope Place ba lumur 013-5672775 tauka 082- 505987 ari pukul 8.30 pagi ngagai pukul 12 tengahari enggau pukul 2 lemai nyentuk pukul 5 lemai Hari Satu ngagai Hari Lima sereta Hari Enam sida ulih dilawa antara 9 pagi nyentuk 12 tengahari.
Mensia mayuh mega ulih meri bantu ngagai Hope Place nengah akaun Malayan Banking Berhad (Maybank) 5112- 8900- 1160 di baruh nama Persatuan Kebajikan Harapan Kuching.