Agih belanja penyampau RM50 juta disedia dikena nyeleti semua sekula repuk lebih agi ba menua ulu, ku Dr Rayong
ENGKILILI: Perintah nengeri ngagihka belanja sepenyampau RM50 juta dikena nyeleti semua sekula repuk kelebih agi sekula menua ulu.
Diatu gaya perengka guna sekula sekalika sekondari enggau primari endang udah kelalu repuk lalu patut diperati kelebih agi ari sukut belanja.
“Nya kebuah perintah nengeri bejalaika inisiatif kediri nyendiaka belanja laban enti minta ari raban Opis Menteri Pelajar begunaka timpuh sereta enda dikeibuh,” ku Dr Rayong.
Kaban Kunsil Nengeri (ADUN) Engkilili Dr Johnical Rayong Ngipa mansutka jaku nya lebuh bejaku ba Program Merarau Sekula Primari (SK) Engkilili No1 diatur begulai Serakup Apai Indai enggau Pengajar (PIBG) ba Balai Komuniti Kunsil Pelilih Lubok Antu, Engkilili kemari.
Ku iya, tubah sekula tuai ba Sarawak nyengkaum ba DUN Engkilili kelebih agi buding, rumah pengajar enggau staf sekula, makmal enggau kelas.
“Semua tu begunaka perati kelebih ari Opis Menteri Pelajar ba renggat perintah besai tang enda entu diperati ngujungka perintah bejalaika ini- siatif numbuhka Opis Menteri Pelajar sida empu diketuaika Dato Sri Michael Manyin,” ku iya seraya nambah pengawa nyiri nya dikearap ulih mutarka isu ti dibantai kelebih agi isu sekula tuai.
“Sebedau tu, perintah nengeri bisi nganjung peminta belanja tang timbal laun diterima ngujungka penanggul majak nyadi lalu kitai ngaul diri gawa,” ku iya.
Dr Rayong besemaya naka ulih deka mantu sekula laban sedarka sekula endur nempa modal mensia ukai semina nyulut ba akademik aja tang mega kokurikulum enggau pemanah ulah.
Ku Ketuai Nembiak Parti Rakyat Sarawak (UPP), kaul rat apai indai enggau pengajar nengah PIBG sekula ulih nentuka kuing pemujur sekula.
“Nya alai aku ngelalau nadai pengawa politik ba atur aktiviti sekula pulaika pemujur program nya,” ku iya.
Ngelansa pasal politik, iya nyemetak madahka aum DUN berengkah Hari Satu tu beguna amat nentuka komposisyen pengari perintah Sarawak berandau enggau perintah besai pasal randau MA63.
“Diatu bala kaban komiti tu enda sebela semina bisi dua pengari Sarawak enggau dua ari Sabah sereta ke bukai bisi 12 iku tubuh pengari PH ari Semenanjung ngujungka nadai pemutus deka bepiak ngagai kededua nengeri enti undi digaga ila,” ku iya.
Iya bepenemu pengawa Kepala Menteri ngemai resolusyen pejurai ngaul hak MA63 endang patut lalu ba pelasar ti betul dikena nguji penaluk pengari PH ba Sarawak sekalika nyukung inisiatif Abang Johari tauka ngarika Semenanjung.
“Enti sida talukka Sarawak tentu nyukung resolusyen Kepala Menteri ila lalu tentu mega ke bukai enti sida mayuh dalih,” ku iya.
Berebak enggau nya, Dr Rayong ngemendarka belanja Projek Mit Pemansang Menua Pesisir (MRP) penyampau RM5,000 dikena nambahka RM3,000 ti diterima sekula sebedau tu.
Sama datai merarau Pemesai Pelajar Pelilih Lubuk Antu Vivien Mujah, SAO Brin Munsang, kepala pengajar Harold Wilson Api, Sapit Ketuai Nembiak UPP Engkilili Peter Jawi, Penghulu Betuk Tubi, Penghulu Nyambong Maweng, bala kepala pengajar, penolong kanan, kapitan, kaunsilor, bala tuai rumah enggau apai indai nembiak.
Nya kebuah perintah nengeri bejalaika inisiatif kediri nyendiaka belanja laban enti minta ari raban Opis Menteri Pelajar begunaka timpuh sereta enda dikeibuh. Dr Johnical Rayong Ngipa ADUN Engkilili