Opis perintah enggau kompeni patut ngaga awak ngangatka isi
SHAH ALAM: Tun Dr Mahathir Mohamad meri langgur penemu ngambika staf opis perintah enggau peribit ngagihka awak pengelama 15 minit bejalaika aktiviti ngangatka isi nyadi pengawa ngemeranka gaya idup bepengerai.
Menteri Menteri madahka bala staf tau ngereja pengawa nya enggau belepa urung pukul 11 pagi ba luar opis berhawa dingin.
“Aku merambu semua opis perintah enggau peribit pukul 11 pagi ngetu kereja (enda lama) lalu sesais, enti ulih ba luar bilik penghawa dingin.
“Aku merambu semua (staf) pansut pengelama 15 minit sesais lalu udah nya pulai kereja baru,” ku iya lebuh bejaku ngelancharka Kempen Promosi Hidup Aktif atau WALK (When Active Living Kicks) renggat nasional Opis Menteri Pengerai, ditu, kemari.
Sama datai bini iya, Tun Dr Siti Hasmah Mohd Ali enggau Menteri Pengerai Datuk Seri Dr Dzulkefly Ahmad.
Dr Mahathir mega ngelalau rayat ngemeratka tiga petua ngambi meruan gerai iya nya nyeliahka diri makai kelalu mayuh, enda nginsap enggau nyeliahka diri ngirup ai bisa.
Iya madahka nadai resia ti dikemeran ngambi meruan gerai umur manggai 93 taun kelimpah ari seruran ngemeranka gaya idup bepengerai.
“Chara idup kitai mesti lantang enggau setipak enggau pengerai batang tubuh kitai,” ku iya.
Dr Mahathir mega bekunsika petua iya nya ngetu lebuh benung nyamai makai laban ulah makai enggau ngirup kelalu mayuh tau ngasuh orang nya gemuk enggau perut gentung.
“Anang makai kelalu mayuh, enti pemakai nya nyamai, ngetu makai,” ku iya.
Ku Dr Mahathir, beguna amat nagang berat tubuh laban batang tubuh mit, tungkul atau deka lantang ngepam darah ngagai semua tubuh enggau muntang.
Iya mega ngingatka rayat Malaysia ngambi suah agi bejalai dikena nyeliahka gumpal isi majak mit maya umur udah manggai.
“Gumpal isi kitai enti enda dikena, nyau kelama deka ngeriut enggau lemi. Rumah aku bisi lif tang aku milih niki tangga,” ku iya lalu nambah, dulu suba mayuh kereja ti ngasuh batang tubuh gerai tang diatu mayuh jam dikena ba opis, duduk aja ari pagi nyentuk lemai.
Ba lansa bukai, Dr Dzulkefly lebuh bejaku madah nitihka asil Tinjauan Kesihatan dan Morbiditi Kebangsaan (NHMS) 2015, siku ari tiga orang besai tuai enda regas.
“Dibida, raban indu iya nya raban ti enda regas dibida sida ke lelaki. Pia mega, rayat Malaysia beumur 60 taun enggau tuai agi mega ditemu enda regas,” ku iya.
Ku iya Kempen WALK dipejalai dikena nentuka rayat Malaysia patut berubah ngambika regas ngereja bemacham aktiviti ngaul batang tubuh kelimpah meransang rayat idup regas agi. — Bernama